سب گجھ دے لائق
پُٹھے ناں کٹھے کرݨ کوئی وݙا تحقیقی کم کائنی پر ہک لیکھے اساں اینکوں تحقیقی تے تخلیقی کم وی آکھ سڳدوں جو اے ناں کہیں نہ کہیں تخلیق کیتے ہوسن، تحقیق وی ضروری اے جو پُٹھے ناں کیوں وجود ء ِچ آئے، ہر ناں دے پچھوں ہک کہانی اے، جیکر کہیں دا ناں ’’کم چور‘‘ یا ’’زیان خور‘‘ اے تاں کوئی نہ کوئی ڳال ضرور اے ، کائنات دی ہر شئے بھاویں کویلی اے یا ہاتھی تخلیق دا کوئی نہ کوئی مقصد ضرور اے ، ہر شئے دا اپݨا اپݨا کم تے اپݨا اپݨا عمل اے ، ایں کم تے ایں عمل تے تحقیق ضروری اے ، ناں رکھݨ ، پُٹھا ناں ، پیار دا ناں ، اے وی ہک عمل تے ہک کم اے، ایں تے وی ڳال بات ضروری اے۔ لوک اعتراض کر سڳدن جو کیا ایں تحقیق نال بندہ سائنسدان بݨ ویسے،میں آکھداں بھاویں سائنسدان نہ بݨسے پر جیویں اربیں کھربیں دی گنتری ہک توں شروع تھیندی اے ایویں سائنس جیندا مطلب علم ہے نِکے نِکے کمیں توں شروع تھیندے ۔ ویسے سدھے نانویں دے نال نال پُٹھے نانویں دا ریکارڈ بݨاوݨ ایں سانگے ضروری اے جو خواجہ فرید سئیں فرمائے ۔
’’ظاہر تے گجھ سب گجھ دے لائق ‘‘
دھریجہ نگر کاپی تے لکھدے ٻیٹھے ہاسے ہک بندے آکھیا پُٹھے ناں کٹھے کرݨ دا کیا فائدہ ؟ اے سوال ہر بندے دا سوال اے ، پُٹھے ناں کوں کٹھے کرݨ دا مطلب دولت کٹھی کرݨ نی پر اے دولت توں گھٹ کائنی جو پُٹھے نانویں نال وی کہیں برادری تے کہیں قوم دی دانش دا پتہ لڳدے۔ جیکر پُٹھا ناں سُݨ تے کھل آ ونڄے تے مونہوں تُساں اے وی آکھو جو بندے عادت موجب ناں ٹھیک رکھیے تاں سمجھ گھنو جو سدھے نانویں دے نال نال پُٹھے ناں کٹھے کرݨ دی محنت وی اجائی کائنی۔
پُٹھے ناں کٹھے کرݨ ایلے ہک اوکھ اے تھیندی اے جو کوئی اپݨا پُٹھا ناں ݙسݨ پسند نی کریندا، ول ول پچُھو تاں آکھدن یاد کائنی، حالانکہ یاد ہوندے ، شرمشاری توں ݙسیندے کائنی۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان