سبھنائیں دے سوچݨ دی ڳالھ اے
سئیں !سِدھی سچی اَتے صفا ڳالھ ایہ ہے جو اساں سرائیکی رودھیں وات ہیسے‘ اسیکوں رودھیں وات ݙیوݨ آلے اسیݙے اَپݨے اَتے پرائے ݙونہیں ہِن ‘ پر سوچوں سمجھوں تے اقاس کروں تاں اساںاپݨے نال آپ اِی گھٹ کائنی کیتی ‘ پکھنڈی پیریں ‘ مکری مُلواݨیں ‘ اسیݙی مت ماری ہوئی ہئی ‘ ہُݨ سیاسی اڳواݨ وی ہنائیں نال آرلین‘ جئیں مُلاں مُلواݨیں ‘ مسیتاں ونڈیاں ہوئیاں ہِن اَتے آپو اَپݨے عقیدے تے مسلک دی بنا تے اَپݨیاں آپݨیاں انجو انج ہٹیاں کڈھیاں ہوئیاں اِن ۔ اُونویں سرائیکی اٖگواݨیں ‘ ݙڈھ ݙڈھ سِلھ دی اَپݨی اَپݨی نویکلی سیاسی مسیت اُسار گھدی اے۔
’’جھوک‘‘ اِچ چھپل سئیں انیس شاہ جیلانی دا خط پڑھ کراہیں اندازہ تھیندے جو سرائیکی وسیب اَتے سرائیکی لوکیں دے حق حقوق دی ڳالھ کرݨ آلے تے سرائیکی صوبہ بݨواوݨ کیتے بھڄ دُھرک کرݨ آلے سیاسی اڳواݨیں دا آپت اِچ پھیٹا پیا رَہ ڳیا تے او ایئیں نکھیڑیے اَتے کانوں کان تھئے رَہ ڳے تاں شیطان دے کن ٻوڑے ‘ اسیݙا نانی نک نہ دھویسے ‘ جیرھے ویلھے سئیں انیس شاہ جیلانی ہوریں جیہے بندے ای ایہ لِکھݨ کیتے مجبور تھی وَنڄن جو اساں نہ سرائیکی قومی موومنٹ نال اُوں ناں پاکستان سرائیکی پارٹی نال انہیں زور اوریں نال ٹُرݨ نہ اساݙا کم اے نہ جاہ ‘ بھڄ پاسا کیتے سے ۔ تاں باقی کیرھی کسر رہ ویندی اے؟
سئیں انیس شاہ جیلانی ہوریں صحی سچ دے پڑھے لکھیے سُدھ سُرت آلے سیاݨے بندے ہِن ۔ سرائیکی ٻولی دے ودھارے اَتے اونکوں اڳونہاں کرݨ کیتے ہنائیں جیرھی تݨ وَݨ کیتی اے اَتے کریندے پِن ‘ او کوئی گُوجھی ڳالھ کائنی ‘ سرائیکی صوبے تے سرائیکیں دے حق حقوق بارے انہائیں جیرھیاں لکھتاں لکھین ‘ او اَپݨے مَٹ آپ اِن ‘ او ہُݨ وی سرائیکی لغت لکھݨ اِچ جُپیے پِن ‘ جے ایجھا بندہ وی کنی کر پاسا گھن ویندے تاں ایہ اساں سبھنائیں دے سوچݨ سمجھݨ دی ڳالھ اے ‘ ایں بارے باقی ڳالھ مُہاڑ وَلا فزریں چُلیسوں۔!
حوالہ
[لکھو | ماخذ وچ تبدیلی کرو]ٻٹ کڑاک، مصنف: انیس دین پوری۔ ناشر: جھوک پبلشرز ملتان