ساݙا دوست دلیں دا نور محمد خواجہ

شاعر: حضرت خواجہ غلام فریدؒ

کافی نمبر:9

مصرعے:16

الفاظ:80

راگ:بھیروی

کافی

ساݙا دوست دِلیں دا نُور محمد خواجہؒ

ڈھولا یار چہیندا نُور محمد خواجہؒ

ساݙے سارے شرم بھرم دا

تیݙے ڳل وچ لا ڄا

عَرب وی تیݙی، عَجَم وی تیݙی

مُلک پنجاب دا راجہ

زمیں، زَمن وچ وَڄدا گَجدا

فیض تیݙے دا واڄا

قدم تیݙے وچ نَئوں مݨ بھاڳم

اَنڳݨ میرے پئوں پا جا

دلبر جانی، یوسف ثانی

موہَن مُکھ ݙکھلا جا

نوشہ! شہر مَہار دا بَنرا

سِکدی کوں ڳل لا جا

نَین فرید ؔ دے درس پیاسے

آجا نہ ترسا جا

اَوکھے لفظاں دے معانی

•چہیندا: چاہا ونڄݨ آلا

•ڈھولا:سڄݨ،محبوب

•نور محمد خواجہ: حضرت خواجہ نور مہاروی(قبلہ عالم) ضلع بہاولنگر چشتیاں وچ جنہاں دا مزار ہے

•بھاڳم:میݙے کیتے خوش بختی ہے

•انڳݨ:ویڑھا،صحن

•موہن:موہ گھنݨ آلا

•سکدی: چاہت اَتے تانگھ وب ترسدی ہوئی

•بنرا:گھوٹ،دلہا

•درس: دیدار

مختصر وضاحت

•ساݙا دوست دِلیں دا نُور محمد خواجہؒ

ڈھولا یار چہیندا نُور محمد خواجہؒ

وضاحت: اِیں کافی وچ خواجہ غلام فریدؒ نور محمد خواجہ مہاروی(قبلہ عالم ضلع بہاولنگر چشتیاں وچ جنہاں دا مزار ہے) دا ذکر کریندن۔ زیرِ نظر شعر وچ آپ نور محمد خواجہ نال آپݨی عقیدت دا اظہار کریندے ہوئے فرمیندن جو اَساݙے دلاں دا یار نور محمد خواجہ ہِن تے اَساݙا پسندیدہ محبوب وی نور محمد خواجہ ہِن۔

•ساݙے سارے شرم بھرم دا

تیݙے ڳل وچ لا ڄا

عَرب وی تیݙی، عَجَم وی تیݙی

مُلک پنجاب دا راجہ

وضاحت: ایں بند وچ آپ نور محمد خواجہ نال آپݨی محبت دا اظہار تے اُنہاں دی تعریف کریندے ہوئے فرمیندن جو اَساݙی ساری شرم تے بھرم دی لڄ تیݙے ذمے ہے۔ آپ فرمیندن جو عرب وی تیݙی ہے اَتے عجم وی تیݙی ہے تے تو ملک پنجاب دا راجہ ہیں۔

نوٹ:زیادہ تر "سندھ پنجاب دا راجہ" لکھیا ویندے پر معتبر نسخہ جات وچ "ملک پنجاب دا راجہ" ہے۔

•زمیں، زَمن وچ وَڄدا گَجدا

فیض تیݙے دا واڄا

قدم تیݙے وچ نَئوں مݨ بھاڳم

اَنڳݨ میرے پئوں پا جا

وضاحت:ایں بند وچ آپ نور محمد خواجہ دی تعریف کریندن۔ آپ فرمیندن جو زمین،زمن ہر جاہ تے تیݙے فیض دا واڄا(باڄا) وڄدا ہے۔اڳاں آپ اُنہاں نال آپݨی عقیدت دا اظہار کریندے ہوئے فرمیندن جو تیݙے قدم وچ میں کیتے نَو مݨ(ٻہوں زیادہ) چوش بختی ہے۔ مہربانی کر تے میݙے ویڑھے وچ قدم رکھ ونڄو۔

•دلبر جانی، یوسف ثانی

موہَن مّکھ ݙکھلا جا

نوشہ! شہر مَہار دا بَنرا

سِکدی کوں ڳل لا جا

وضاحت:ایں بند وچ آپ نور محمد خواجہ توں ارداس کریندن جو ایہ دلبر جانی، یوسف ثانی آپݨا مُوہ گھنݨ آلا مُکھڑا اَساکوں ݙکھلا ونڄ۔ ایہ شہر مہار دے گھوٹ! میں ترسدی ہوئی کوں ڳل لا ونڄ۔

•نَین فرید ؔ دے درس پیاسے

آجا نہ ترسا جا

وضاحت:ایں بند وچ آپ فرمیندن جو ایہ نور محمد خواجہ! میݙیاں اکھیاں تیݙے دیدار کیتے پیاسیاں ہِن۔ تساں مہربانی کر تے میں دو آ ونڄو تے میکوں ترساؤ نہ۔

نتارا

خواجہ سئیں ایں کافی وچ حضرت خواجہ نور مہاروی( قبلہ عالم ضلع بہاولنگر چشتیاں وچ جنہاں دا مزار ہے) دا ذکر کریندن۔آپ اُنہاں دی تعریف کریندن اَتے اُنہاں نال آپݨی محبت و عقیدت دا اظہار کریندن۔ آخر وچ فرمیندن جو تساں دے دیدار سانگے میݙیاں اکھیاں پیاسیاں ہِن۔ آپ اتھاں چکر لا ونڄو۔

ٻیا ݙیکھو

•درد اندر دی پیڑ

•حسن قبح سبھ مظہر ذاتی

•چوڑا انا ݙے جیسلمیر دا

•اساݙے ایں کم دے بارے وچ ڄاݨݨ سانگے ایہ مضمون ݙیکھو:

•وکیپیڈیا تے کلام فرید

حوالہ

•دیوان فرید بالتحقیق،مجاہد جتوئی