ساکوں ویزے مِل ڳئے

ݙینہ وار جھوک سرائیکی دا اسلام آباد دا بیورو چیف مجاہد بھٹی ٻہوں محنتی کارکن ہے ۔ اسلام آباد دے افسراں نال اوندی چنگی سلام سَت ہے ۔ مجاہد بھٹی سارے پاسپورٹ وزارت خارجہ دے افسر (ڈپٹی سیکرٹری) نعیم ہوتیانہ کول گھن ڳئے جتھوں نعیم ہوتیانہ انڈیا ڈیسک تے کم کرݨ آلے کلرک دے ہتھڑیکے ویزے دیاں ݙہ درخواساں ہندوستانی سفارتخانے نہ صرف جمع کرا ݙتیاں بلکہ ایہ وی آکھیا جو ایہ ویزے جلدی لائے ونڄن۔ ہرویزے نال پندرھاں روپے ویزا فیس وی جمع کرݙتی ڳئی ۔ ساکوں ایہ اُمید نہ ہئی جو ویزے مِل ویسن کیوں جو ساکوں ݙسیا ڳیا ہا جو ویزے دے مرحلے ݙڈھ مہینے وچ مکمل تھیندن ۔اُنّوںڈاکٹرجے ۔ سی۔ بترا سئیں دا روز ݙیہاڑی فون آندا پیا ہا جو پراگریس ݙسو۔ ویزے کیتے درخواساں جمع کراوݨ دے بعد ڈاکٹر جے ۔سی۔ بترا کوں ݙسیّا ڳیا جو ساݙا کم مکمل تھی ڳئے۔ بترا سئیں ہندوستان دی وزارت خارجہ دے افسراں کوں درخواس تے سفارش کیتی جو ساݙے ممھان سرائیکی وفد؍ ڈیلیگیٹ دے ویزے جلدی لائے ونڄن۔ بر حال اُمید دے خلاف 11؍اگست کوں ساکوں ویزے مل ڳے۔ ایں ویزے دی معیاد 10؍ستمبر2009ء تئیں ہئی ۔ ایں مُد وچ ساکوں صرف ݙہ ݙینہ قیام دی موکل ہئی ۔ ایہ وِزٹ ویزا ہا جیندی وجہ کنوں پُلس رپورٹ کرݨ دی ساکوں چُھوٹ ہئی۔ ویزے مطابق ساکوں دِلّی ‘ آگرہ تے اجمیر وزٹ کرݨ دی وی اجازت ہئی۔ ویزے درخواساں وچ اساں پٹیالے ‘ چندی گڑھ تے علی گڑھ وزٹ کرݨ دی درخواست کیتی ہئی پر اُنہاں شہراں دا ویزا ساکوں نہ ملیا ۔ ڈاکٹر جے ۔ سی ۔ بترا دی دعوت اُتّے ساکوں ہندوستان ونڄݨ دی موکل مل ڳئی۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان