ساوݨ رُت

ھک زمانہ ہا جڈاں بنی دے واسی سانونڑ رت دا سک نال بھالا رکھدے ہن۔ سانونڑ وس ہووے ہا تاں باقی یارھاں مہینے سکھیے تے خوشحال گزردے ہن۔ سانونڑ دا ہک ہک ڈینہہ آ س گھن کیں ابھردا ہا مینہ نہ تھیوے تاں کریہہ دے ڈر کیں رات پاسے پتریندیں گزردی ہائی۔ اٹھی اٹھی آسمان تیں چارے پاسے جھات مارڑیں، کڈاہو کھمنڑ ٹوہکدی ڈسے ہا تاں امید لا کے سم وجڑاں جو وڈے ویلھے آنڑنگ لیسوں۔۔ پہلی پندھری سانونڑ نہ وسے ہا تاں خیراتاں کیتیاں ویندیاں ہن۔۔ اتے بال منہ کالے کر کے "کالی بکری کالا شینہہ" گھتو دانڑیں وسے مینہ"" اہدیں ہوئیں در در تے ونج کے پندے ہن اتے پنیے ہوئے دانڑیں دیاں گگھریاں خیرات کریندے ہن۔۔ تے ول اللّٰہ سوہنڑیں کوں وی ترس آ وینداں ہا۔۔ سانونڑ وس پوندا ہا رات دا آنڑنگ ہووے تاں آنڑگی پیرو ننگے کنڈیں ، نانگ وٹھوہیں دے ڈر کیں بے نیاز گھرو نکل پوندے ہن۔ تیز بارش اچ تلکنڑ کیں بچنڑ سانگے ڈانگ دی ٹیک نال کہی مونڈھے تے رکھ کیں ملخ دی لٹھ تے پھیری مار کے وکڑے تے ٹپے سٹن ہا۔ نئیں دا پانڑیں وکڑے نال ٹھاہکے ہا تاں اللّٰہ دے ناں دا نعرہ ماریا ویندا ہا۔

کجھ بند بھریندے ہن تاں کجھ ترٹ ای ویندے ہن لیکن سانونڑ دے وسنڑ نال ہر کہیں دے چہرے تیں رونق ہوندی ہائی۔ درخت ، چھینبڑ ، بوئی تے ساری جوہ پھٹ پوندی ہائی۔۔ سویل سویل پکھیں دیاں بولیاں خاص کر دور کتھائیں تتر بول پووے ہا تاں ہاں ٹھر ویندا ہا۔۔ مال بکریاں فجر نال جوہ اچ ہکل چھڑیندیاں ہن پچھاں کوں رج کے امن امان نال گھر ول اندیاں ہن۔۔ بکھ ہائی لیکن انسان اخلاقی طور تے اتنا گریا ہویا نہ ہا جو چوری کرے ہا۔

زمانہ بدل گئے سولر تے بجلی آلیاں ٹربائناں لگ گائن بنی بیٹ دا فرق نہیں ریہا۔ اللّہ پاک دی رحمت ہے انسان خوشحال ہے اتے لوکیں کوں سانونڑ دے وسنڑ دی وی او آس تے سک نہیں رہی۔۔ لیکن پتہ نہیں کیوں جو جڈاں ای سانونڑ لگدے، میکوں ڈکھنڑ دے گھلنڑ آتے سانونڑ دے وسنڑ دا بھالا ضرور ہوندے۔۔

کوئی شک نہیں جو سائنس تے ٹیکنالوجی زندگی کوں بہوں سکھیا کر ڈتے لیکن سانونڑ رت اچ جڈاں گزریا ویلھا یاد آندے تاں ہک عجیب جھئں مونجھ الی کیفیت طاری تھی ویندی ہے۔ اوں زمانے دے لو کیں دا ہک بئے دے نال جڑ کیں رہنڑ تے ڈکھ سکھ کوں آپڑاں سمجھنڑ زندگی کوں بہوں سونہڑاں کر ڈیندا ہا۔۔ اج دنیا گلوبل ولیج بنڑ چکی ہے جتھاں فاصلے سمٹ گئن اتھائیں ہکے گھر اچ رہنڑ آلے ہک بئے کیں کتھائیں دور تھی گئن۔ (شبیر لغاری)