ساحلؔ بزدار

مردم خیز دھرتی سکھاݨی آلے دے شاعر سئیں ساحل بزدار دا اصل ناں غلام محمد خاں ہا۔ آپ 1933 ء کوں خان محمد بزدار دے گھر سکھانی والا ،تحصیل و ضلع راجن پور اچ پیدا تھئے، ساحل مرحوم جوان تھئے تاں انہاں شعر و ادب آلے پاسے خاصی توجہ ڈتی ۔آپ دے کلام توں معلوم تھیندے جیویں او ہ معرفتِ حق دیاں تمام منزلاں طے کر چکے ہوون ، تے نعرئہ اناالحق دی حقیقت توں بخوبی واقف ہوون ۔شئیت ایہاای وجہ ہے جو ساحل بزدار منصورؒ حلاج دے انتہائی معتقد نظر آندن، تے اپنی شاعری اچ جا بجا منصورؒحلاج دا ذکر کریندن۔حتیٰ کہ انہاں اپنی ہک شعری کتاب دا ناں وی’’سولی کوں سک منصورؒ دی‘‘ رکھیا ہا ۔اے کتاب جھوک توں شائع تھئی آپ دی 2015ء اچ تھئی ہئی۔

؎تہوں منصور دے غم ماس کھمدن

جو بے جرمی دے ول ول پور پمدن

(1) غزل

ایہا منصور مہمانی ڈتی گئے

لہو اپنے دی قربانی ڈتی گئے

ڈساگئے فلسفہ انسانیت دا

مکمل طرزِ انسانی ڈتی گئے

دلیں کوں ڈے گئے روشن ضمیری

فکر کوں سوچ عرفانی ڈتی گئے

خودی سرمایہ ئِ انسانیت ہے

ایہو مفہوم قرآنی ڈتی گئے

کہیں دی یاد نسلاں یاد رکھسن

او ساحلؔ یاد لاثانی ڈتی گئے

       

(2) غزل

پیار دی تاری وی ترنی پئے گئی

پل صراط آخر گزرنی پئے گئی

اوندی چاہت دا نتیجہ مل گیا

زندگی بے موت مرنی پئے گئی

ہِیں صدی وچ ہے پیمبر حسن دا

گالھ یوسف نال کرنی پئے گئی

کالی زلفیں دی ڈٹھی دہشت جڈاں

رات کوں مسند سمبرنی پئے گئی

اج ولا لکھنے اوندے خط دا جواب

وت قلم رت نال بھرنی پئے گئی

٭٭٭

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء