ساحرؔ رنگ پوری

اَساکوں تاں حیاتی ہنڈا ڳئی اے۔کجھ لوک اِینجھے وی ہوندن جیڑھے حیاتی ہنڈیندن،اُنہاںوچوں ہک ناں ساحرؔ رنگ پوری دا ہے۔ساحر جے کر جادوگر کوں آکھدن تاں اے نینگر واقعی جادوگر لڳدے۔شکلوں سکولی لڳدے پُچھو تاں ایم فِل ٻنے لائی ودے۔پروکے سال مزاحمتی شاعری دی کتاب چھپواوݨ آیا تاں کتاب دا ناںــ’’باغی تخت لہوردے‘‘ چُݨی ودا ہا۔میں آکھیا ’’قیدی تخت لہور دے‘‘ باغی؟اے کیا ہے۔ساحرؔ ولدی ݙتی وقت وقت دی ڳالھ ہے سئیں عاشق بزدار اَپݨی کتاب دے ناں نال اساکوں جیڑھا دگ ݙکھائے اَساں اوں ڳالھ کوں اڳیتے ودھائے۔کل اساں تخت لہور دے قیدی ہاسے احٖ باغی ہیسے۔

رنگ پوری کوں میں جادوگر اِیں سانگوں آکھیے جو نکی عمراں وچ وݙے وݙے کم کریندے۔پہلی کتاب دے تھولے عرصے بعد اِیندی ݙوجھی کتاب دا آوݨ جادوگری نی تاں ٻیا کیا ہے؟ساحرؔ دی ہمت ،جوش،جذبہ،پڑھائی نال پیار تے اَپݨی دھرتی ،اَپݨی مٹی،اَپݨے وسیب،اَپݨی ماء ٻولی تے سرائیکی زبان و ادب نال اِیندی دیوانگی دی حد تک جڑت کوں ݙیکھ تے اِیندے بارے ڄاݨݨ کوں دل کیتا۔میں پُچھیا میکوں قلمی ناں دا پتہ ہے اصل ناں کیا ہے؟ولدی ݙتس عبدالمالک سلطان۔پیو دا ناں،آکھیس ملک احمد بخش کھوکھر،میں آکھیا اَپݨے پڑھݨ دی کہاݨی سُݨا آکھیس پرائمری فرید آباد،میٹرک رنگ پور،ایف ایس سی مظفر گڑھ،بی ایس سی ملتان،ایم ایس سی تے ایم فل یونیورسٹی آف انجینئرنگ اینڈ ٹیکنالوجی لاہورتے نال ای پرائیویٹ نوکری لیکچرر یونیورسٹی آف سائوتھ ایشیا لاہور۔

ساحرؔ نال بے تکلفی ڈھیر ہے،حشر وی ݙاڈھا کرینداں شیت اِیندی وجہ اوندا سہݨ ہوندا ہے،اے ڳالھ اِینویں ہے جیویں سرائیکی قوم ہمیشہ سہندی آندی ہے تے پرلے حشر کیتی اَمدن۔جیجھلے جھوک اَمدیںچپ نی کریند’’ا چیں چیں چاں چاں‘‘ لئی رہندیں۔کوئی ڳالھ کرو تاں رُس تے لہور ونحٖ منہ دھوویں۔اے ݙس میں تیکوں پکھی آکھاں یا پکھی واس،رنگ پوری آکھاں یا رنگباز؟۔

ساحرؔ رنگ پوری آکھدے جو ،یار سکھݨیاں ڳالھیں کر تے ویلہا نہ ونڄااللہ دا ناں من میݙی شاعری تے کجھ لکھ ݙے ترائے مہینے تھی ڳن ترلے کریندا وداںاِتنی منت خواجہ فرید دی کراں ہا، او وی خیالیں وچ آ کجھ نہ کجھ لکھوا ݙیوے ہا۔میں آکھیا رنگ پوری !توں وی سچائیںپر میکوں کجھ آوے تاں لکھاں،جیڑھیاں سیپ نی کڈھ سڳدیاں ڄاݨ تے موتی کیر ٻہندین جو چُݨدے چُݨدے ݙینہہ لہہ ونڄے،جینکوں پیر گساواں نہ آوے پچھیتے پیر اوہو کریندے،میݙا حال اوہو ہے۔میݙی ڳالھ تے جھوک دا اُݙراک پکھڑو چِڑ تے آکھدے یار توں ڳالھیں مندے لکھ ݙے پر کجھ لکھ ضرور ݙے۔میں آکھیا چلو کجھ لکھداں توں کجھ سُݨا! ساحرؔ موسے مولوی آلی کار کن تے ہتھ رکھ کے رُنڑکا لِیندے رُنڑکا؟کجھ لوک میݙی اِیں ڳالھ تے حیران تھیسن پر اے سچ اے رُنڑکا چنگا لا گھندے۔طالب درد دا اثر ہِس،جوڳ اِچ بند چنگا آکھدے۔سݨو

ساتھے پیر ٹِکا کے ٹُردا آ اَساں راول راہ ہیں رنگ پور دا

اَساں پُونبل چیتر اِچ چوٹی دی اَساں پھپھڑیا گھاہ ہیں رنگ پور دا

اَساں پیار محبت ہیں ساحرؔ اَساں قول وفا ہیں رنگ پور دا

ساݙے بعد کہاݨی مر ویسی اَساں چھیکڑی ساہ ہیں رنگ پور دا

واہ رنگ پوری واہ!سچی ڳالھ اے ہے رنگ پوری اَپݨے دل آلی ڳالھ کر تے دھرتی ماء دے پُتر ہووݨ دا حق ادا کیتے،جیں اَپݨے وطن وسیب دی ڳالھ نی کیتی میں اونکوں شاعر نی منیندا،اساکوں پیرس دی خوشبوئیں نال کیااساݙے تھل تے اساݙی روہی دے کرینھ تے ڄال اساݙے کیتے مشک تے عنبر ہِن۔

ساحرؔ رنگ پوری جیویں اَپݨی کتاب ـ’’باغی تخت لہور دے‘‘ وچ اَپݨے وسیب دے ݙکھیں دی ڳالھ کیتی ہے ایہو درد اوندی عشقیہ شاعری وچ وی ہے۔

لوکی درد سݨاوݨ پئے گِٖن

گُنگے شہر الاوݨ پئے گِٖن

جیہاں لائنیں وچ محسوس کیتا ونحٖ سڳدے۔میں تاں اے آکھداں جو ساحرؔ دی شاعری وچ جاہ جاہ تے اَپݨے وسیب دا رنگ نظردے۔اے رنگ ݙیکھو:

جیندا ݙیکھݨ میݙے کیتے زیارت دی طراواں ہے

میݙے کیتے او شخص احٖ تئیں بُٖجھارت دی طراواں ہے

کوئی وی نقص نئیں ساحرؔ مکمل ہے او ہر ڈھنگ وچ

او خواجہ سئیں دی کافی دی اِدارت دی طراواں ہے

ساحرؔ دی کتاب’’چوڳ‘‘ اِچ  غزل ،ڈوہڑہ،قطعہ،نظماں تے سرائیکو سب کجھ ہے ، شاعری وچ تصوف دا رنگ وی ہے۔

بقا دی ڳول اِچ ٹُرے ودے ہیں

بقا نہ مِلسی فنا تاں تھیسوں

جیہاں لائناںساحرؔ دی صوفیانہ شاعری دی گواہی کیتے کافی ہِن۔

میں کہیں ویلے ساحرؔ نال کوڑیج تے آکھداں جو تیکوں پر لڳ ڳن تاں ساحرؔ آکھدے جتنے وی پر لڳن جھوک تاں نی چھوڑ سڳدے۔ساحرؔ سچ آکھدے جیڑھا اَپݨی جھوپڑی تے اَپݨے ویہڑے نال پیار کریندا ہووے اونکوں محل دی حیاتی سواد نی ݙیندی۔ساحرؔ پڑھیا لکھیا بندا ہے او ملتان دے کلبیں وچ وی ونحٖ سڳدے پر ملتان آوے تاں جھوک اِچ اینویں ہوندے جیویں مچھی پاݨی اِچ۔او آپ آکھدے:

تیݙیاں چوڳاں چُڳ اُݙراک تھئے

تیݙی چوڳ دے پلے لوک ہیسے

نہ چھوڑیں ساحرؔ موئے جیندیں

تیݙی جھوک دے جھلے لوک ہیسے

ساحرؔ دی جھوک تے اساݙے نال محبت ہے جو اے جیہاں ڳالھیں کریندے پر میں سمجھداں جو شاعر دی ڳالھ کہیں ہک ویلے وقت تے نہ کہیں ہک ڄݨے تے جھوک سانگے ہوندی اے،اوندی ڳالھ ہر ویلے تے ہر زمانے دے نال اوں شے سانگے ہوندی ہے جیندا تعلق دھرتی نال ہوندے۔میں سمجھداں ساحرؔ رنگ پوری دی جھوک سرائیکستان ہے تے اوندی مخاطب سرائیکی ماء دھرتی ہے۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ