ساجدؔ قدوس

اصل ناں       عبدالقدوس

تخلص          ساجدؔ

ڄمݨ            1958ء

تعلیم            ایف ۔ اے

پیشہ            حکمت

فون نمبر         0308 7718730

جاہ پتہ          محلہ عید گاہ لیہ

ادبی تنظیم ’’ تھل دامان سرائیکی سنگت‘‘ لیہ دے جنرل سیکرٹری حکیم عبدالقدوس ساجدؔ شاعر ابنِ شاعر ہن۔آپ دے والد عبداللہ نذر وی چار زباناں (سرائیکی ،اردو ، پشتو تے فارسی)دے شاعر ہن۔جݙاں جو حکیم ساجد قدوس وی سرائیکی دے مہاندرے شاعر ہن۔تے سرائیکی زبان و ادب دے فروغ واسطے آپ دیاں ڈھیر خدمات ہن۔آپ’’سرائیکی ادبی سنگت بلوچستان ‘‘ کوئٹہ دے بانی ، لیہ ادبی سوسائٹی ‘‘ لیہ دے سر پرستِ اعلٰی تے ٻیاں کئی ادبی تنظیماں نال منسلک ہن۔تے آپ اپݨیاں ادبی خدمات دے اعتراف اچ کئی ایوارڈز وی حاصل کر چکے ہن۔جتھوں تک آپ دی غزل دا تعلق ہے تاں خوبصورت غزل لکھدن۔نمونہ کلام حاضر ہے۔

غزل

اُتھاں ایوان وچ ہر ہک خدا دا رقص جاری ہے

اِتھاں گنگدام وستی وچ بلا دا رقص جاری ہے

فرائض منقسم تھی ڳئے اساݙے درمیاں ایویں

اِتھاں جھمر وفا دی اُتھ جفا دا رقص جاری ہے

جنہاں سجدہ میکوں کرݨے انہاں کوں ویر سُجھدا پئے

میں کھوہ اچ ، کھوہ دے ٻاہر ہر بھرا دا رقص جاری ہے

کہیں در تے خوشی دے جھڑ کݙؤ ماتم دی کئو آوے

حیاتی دا سفر جاری ، قضا دا رقص جاری ہے

کݙہیں ساجدؔ او سُݨ گھنسی میݙی قربت دا رب ایکوں

اڄاں کجھ دیر لڳݨی ہے دعاء دا رقص جاری ہے