سائنسی علم دی پہلی کتاب تے جعفر عباس بزدار
کائنات دے سائنسی علم بارے سرائیکی زبان اچ لکھیجݨ آلی پہلی کتاب'کائنات دا سفر' تواݙے ہتھاں اچ ہے۔ واہ واہ اے۔ اللہ بادشاہ اے۔ بزدار شاعری دے جھر جنگل جھڳیندے، نثر دے پندھ کریندے سائنسی علم دی پوڑی چڑھ ڳن۔ اے چھڑا بزداریں دا اعزاز نئیں بلکہ سرائیکی قوم دا ماݨ اے۔ زباناں مختلف علوم نال تکڑیاں تھیندن۔ سرائیکی زبان دی ترقی دا پندھ شاعری توں نثر ،تے ہݨ سائنسی نثر تک پُڄ ڳے۔ اے ایں ڳالھ دی ݙس اے جو پرہا باکھدی پئی اے۔ وسوں جاڳدی پئی اے۔ سُتے اْشاک تھیندے پن۔ سوشل میڈیا دے ایں دور اچ جیڑھے نینگر کتاب ٹھپ انٹرنیٹ تے ٻہہ ڳئے، فیس بک دی جان نئیں چْھڑیندا، اتھاں ہک نینگر سوجھوان دا سائنس بارے اپݨی ما ٻولی اچ کتاب لکھݨ، سرائیکی نینگر دے ہوش تے شعور دی علامت اے۔ سائنس ہمیشہ دنیا تے راج کیتے۔ مُنڈھ قدیم کنوں سیانڑیں سوڈھے سائنسدان کائنات دے راز ڄانڑݨ دے تݨ مریندے رہ ڳن۔ اڄ وی اے سلسلہ جاری اے۔
ـ"روز نویں ہم چس وے میاں جی "
انگریزی زبان ایں ویلھے دنیا تے راج کریندی پئی اے۔ مکمل سائنسی زبان بݨ ڳئی اے لیکن ایندا اے مطلب کینی جو دنیا تے ݙوجھیاں زباناں اچ سائنسی کم کینی ہونڑاں۔
"ہر جاہ ذات پنل دی"
تݨ وݨ دا پندھ جاری رہندے۔ ہر قوم او بھانویں ترقی یافتہ ہووے یا ترقی پذیر، اڳونہی دا پندھ جاری رہندے۔ سرائیکی قوم دے سوجھوان وی روز نویں سک اچ ہن۔ جعفر عباس بزدار دا اے پورھیا ایندی ہک سوہنڑیں مثال اے۔ شوق بانہہ پکڑیندے، جذبے کم کرویندن، عشق راہ ݙکھیندے ول دلی ڈھہی کوہ تھیندی اے۔ ساݙے نویں نینگر، جعفر عباس بزدار دے ایں کم دی ریس کریسن، ماݨ کریسن تے ایں کم کوں مزید اڳونہاں ٹُریسن کیوں جو ٹردا بندہ پندھ کر ویندے۔
سرائیکی زبان اچ جعفر عباس بزدار دا سائنسی موضوع تے بنیادی کم آوݨ والے ایرے دی پہلی سِلھ ہے۔ دنیا ماء ٻولی دی اہمیت کوں تسلیم کیتے۔ یونیسکو[UNESCO] دا چارٹر آہدے جوٻال کوں مونڈھی تعلیم اوندی ما ٻولی اچ ݙیو۔ سائنس ݙسیندی اے جو ٻال ماء دے پیٹ اچ ماء دی زبان سکھݨ تے سمجھݨ پئے ویندے۔ ساری دنیا اچ ہک توں زیادہ زباناں کوں نعمت سمجھیا ویندے۔ رنگا رنگی رب سوہنڑیں کوں وی بھاندی اے۔ الحمداللہ! اساں ہک اینجھے ملک اچ وسدے ہیں، جیندا بیانیہ ہک اللہ، ہک کتاب تے ہک زبان (اردو) ہے۔ جے صدیاں دی تاریخ رکھݨ آلیاں قوماں اپݨی زبان تے زبان دی ترقی کیتے ٻولن تاں "غدار" ____ واہ بھئی واہ۔ اتھاں ݙوجھیاں دی زبان تے قبضہ کرݨ، سرائیکی کوں پنجابی زبان دا لہجہ آکھݨ ݙڈھپ اے، کوئی تقدیر دا لکھیا نئیں۔
جعفر عباس بزدار ہک ماہر استاد وانگو ٹرمینالوجی[TERMINOLOGY] کوں کِھڑائے بغیر ہک ہک، ݙوں ݙوں فقریاں اچ چیزیں دی وضاحت کیتی اے۔
کہکشاں کیا ہے؟
"اے ارباں کھرباں تارئیں، نیبولائی، گیسیں، گردوغبار تے سیارئیں نال مل تے بنڑدی اے"۔
تارا کیا ہے؟
"تارا گیس دا بنڑیا ہویا ہک گول جسم ہوندے جیندی آپڑیں روشنی ہوندی ایـ"۔
سیارا کیا ہے؟
"سیارہ ہک گیسیں یا چٹانیں نال بنڑیا ہویا وݙا گولہ ہوندے۔ جیڑھا تارے دے گرد گھمدے۔ ساݙی زمین وی ہک سیارہ اے تے اے ہک وݙے تارے (جیندا ناں سجھ اے) دے گرد 19 میل فی سیکنڈ یا 67 ہزار میل فی گھنٹہ دی رفتار نال گھمدی پئی اے"۔
ایویں جعفر عباس بزدار پُکھ در پکُھ، باب در باب مونڈھی سائنس کنوں لا تے جدید سائنس دیاں ڳالھیں اینجھے سوہنڑیں طریقے نال بیان کیتین جو چس آ ڳئی اے۔ کتاب پڑھ تے میں جیہاں نثرنگار، سارے لوظ بْھل، کائنات اچ اْݙدا ودے۔ جعفر خاں مبارک ہووی، اے کم تیݙے حصے آیا۔ عاشق خان بزدار دے بعد بزداریں دا ہک نمبر ٻیا ودھ ڳئے۔
عبدالباسط بھٹی
30 ستمبر 2019
ملتان
حوالہ
[لکھو | ماخذ وچ تبدیلی کرو]کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان