سئیں ملک اقبال حسن بھپلا

ملک اقبال حسن بھپلا دی ذات تے شخصیت کہیں تعارف دی متھاج کائنی ، آپ ملتان دے ہک معزز گھراݨے دے چشم و چراغ ہِن ، یونین کونسل قاسم بیلہ دے چیئرمین رہ ڳن ، اساں آکھ سڳدوں جو اُنہاں جوانی وچ زمینداری چھکائی ہے تے ٻڈھیپے وچ ادب دے میدان وچ آئن تاں وݙے وݙے ’’پہلوانیں‘‘ دی کنڈ لوا چھوری اے ۔ کتابیں چھاپݨ دا معاملہ آئے تاں ایندے وچ وی بازی گھدی ڳن۔

ملتان دے سرائیکی حلقیاں وچ سرائیکی کتاباں چھاپݨ دا رواج ٻہوں گھٹ ہے ، ملتان دے نامی گرامی شاعراں وچ صرف چند شاعر ایجھے ہِن جنہاں دیاں کتاباں شائع تھئین ۔ باقی ٻہوں سارے شاعر ’’صاحبِ دیوان‘‘ ہووݨ دی نعمت توں محروم ہِن ، جݙݨ جو انہاندے مقابلے اِچ ملک اقبال حسن بھپلا ٻہوں خوش قسمت شاعر ہشن جو اُنہاندیاں مختصر عرصے وچ درجن دے لڳ بھڳ کتاباں شائع تھی چُکن ۔

ملک اقبال حسن بھپلا دی شاعری بارے مناسب تبصرہ سینئر حضرات بہتر کر سڳدن البتہ میں اتنا عرض کریساں جو موصوف دے لفظیں تے شعریں وچوں اپݨی مٹی دی خوشبو آندی اے ، بلاشبہ انہاں کوں اپݨی مٹی ، اپݨی دھرتی تے اپݨے وسیب نال ٻہوں پیار اے ، ایں محبت دا اظہار انہاندے ہک ہک لفظ ، ہک ہک سطر تے ہک ہک شعر وچوں تھیندا نظر آندے ۔ سئیں ملک اقبال حسن بھپلا دے کلام وچ سرائیکی زبان دی نرمی ملائمت تے مٹھاں دیاں ساریاں خوبیاں موجود ہِن ۔ انہاں تلخ تے کَوڑی گاٖلھ وی شیریں انداز نال کیتی اے ، میں سمجھداں سئیں اقبال حسن بھپلا دی شاعری ہوا تے خوشبو دی مانند اے جینکوں اساں محسوس تاں کر سڳدوں پر قید نہیں کر سڳدے ۔ میں اپݨی تے ادارہ جھوک دے سینکڑاں کارکناں تے نمائندیاں دی طرفوں سرائیکی زبان واسطے بہترین ادب تخلیق کرݨ تے دلی مبارک باد پیش کرینداں تے اُمید کرینداں جو موصوف ادب دی خدمت دے حوالے نال اپݨا مشن جاری رکھسن ، سرائیکی ماء ٻولی دی خدمت کریندے رہسن ، ایندے نال نال اساں وسیب دے ٻئے زمینداریں تے جاگیرداریں کوں وی ارداس کریندوں جو او سئیں ملک اقبا ل حسن بھپلا دی تقلید کرن ، ایندے وچ انہاندی شان اے نہ تاں یاد رکھݨا چہیدے جو ایں کائنات وچ ٻہوں سارے فرعون ، قارون تے ابوجہل دولتیں دا طوق قبر تک چائی ڳن مگر اَحٖ انہاندا ناں اَحٖ ’’مندے‘‘ دا سوا کجھ نی۔

سئیں ملک اقبال حسن بھپلا ٻہوں چنڳے شاعر ہووݨ دے نال نال چنڳے دوست تے چنڳے سنگتی ہَن ۔ مہاندرے لکھاری تے درویش صفت افسر شیخ محمد سعید احمد دی ایں ڳالھ نال اتفاق اے جو بھپلا سئیں اللہ دے ولی ہن تے ایجھے لوک روز روز نی صدیاں بعد پیدا تھیندن ۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ