سئیں ایہ مشاعرہ ہے مجلس نئیں!
سئیں ایہ مشاعرہ ہے مجلس نئیں!
[لکھو | ماخذ وچ تبدیلی کرو]لکھت: فیضؔ بلوچ
پچھلے ݙیہاں ساکوں ہک کل پاکستان سرائیکی مشاعرے تے ونڄݨ دا اتفاق تھیا۔ایہ مشاعرہ سرائیکی وسیب دے ہک چھوٹے جھئیں قصبے وچ ہا۔جھتاں ہک معروف روحانی بزرگ دا مزار ہے‘جیندے سالانہ عرس دے موقعے تے ہر سال ہک بھر پور سرائیکی مشاعرے دا اہتمام کیتا ویندے۔ایں واسطے اتھاں وݙے وݙے شعراء حضرات آئے ہوئے ہن۔صاحب دعوت (سجادہ نشین) ہک پڑھیا لکھیا ادبی ذوق رکھݨ آلا با شعور آدمی ہا۔اوہ آوݨ آلے ہر شاعر دا وݙی چاہت تے محبت نال استقبال کریندا کھڑا ہا تے ول ہر شاعر کوں ہک سرائے نما حال کمرے وچ ونڄ ٻلہیندا ہا۔ساکوں وی وݙے خلوص نال ملیا تے ول کمرے وچ ونڄ ٻلہایس۔جتھاں ساݙے کولوں پہلے صرف پنج ست شاعر آئے ٻیٹھے ہن۔ایندے بعد شعراء دی آمد دا سلسلہ شروع تھی ڳیا‘ایں دوران ساکوں وی ہر شاعر نال بالمشافہ ملاقات دا موقعہ مل ڳیا‘کجھ شعراء حضرات نال پہلی واری تعارف تھیا۔بہرحال شعراء برادری نال مل کے ٻہوں خوشی محسوس تھئی‘ہر شاعر اپݨے اپݨے ہم مزاج دوست احباب نال حال احوال تے ڳپ شپ اچ مصروف ہا جو اِنوں صاحب دعوت اپݨے ٻانہہ ٻیلیاں نال روٹی گھن کے آ ڳیا تے ول اساں سارے روٹی کھاوݨ لڳ پیوسے۔پر ساݙے کجھ سینئر شعراء حضرات میکوں ایں موقعے تے نظر نہ آئے‘جنہاں دا ناں مشاعرے دے اشتہار تے سر فہرست ہا۔
میں اپݨے رلے میز تے روٹی کھاوݨ آلے ہک دوست کنوں پچھݨاں کیتا جو ساݙے فلانے دوست اڄاں تائیں نہیں پہنچے ایندی کیا وجہ تھی سڳدی ہے؟اوں دوست جواب ݙتا بلوچ صاحب توں وی اصلوں بھولا بݨیا ٻیٹھیں‘اوہ صاحب تے کجھ ٻئے حضرات ایں نال آلے کمرے وچ آئے ٻیٹھے ہن تے اوہ وی روٹی پئے کھاندن۔میں آکھیا ول تاں صاحب ِ دعوت انہاں کوں انج ٻلہا کے چنگاں نہیں کیتا۔حالانکہ ایں حال کمرے وچ انہاں کوں ٻلہاوݨ تے روٹی کھواوݨ دی کھلی جاء موجود ہے‘کاش جے انہاں کوں وی ساݙے رلے ٻلہاکے روٹی کھویندا تاں کتناں اچھا تے خوش گوار ماحول ہوندا۔اوں دوست نے آکھیا سئیں ایہ ڳالھ نہیں بلکہ صاحب دعوت تاں ٻہوں خلوص آلا بندہ ہے‘ لیکن ساݙے کجھ شعراء بھراء ساݙے رلے بہوݨ پسند نہیں کریندے۔ایہ ڳالھ سُݨ کے میں حیران تھی ڳیم تے میݙے ذہن اچ یکدم ایہ سوال پیدا تھیا جو یا اللہ ایہ سٹیج تے مشاعرہ کیویں کٹھے پڑھسن؟ خیر سئیں روٹی دے بعد چائے آ ڳئی‘اڄاں اساں چائے پیندے ٻیٹھے ہاسے جو مشاعرے دی کاروائی شروع تھی ڳئی‘ جے تائیں اساں وی چائے پی کے سٹیج تے پُڄ ڳیوسے۔
اڳوں پنڈال سامعین نال ایں بھریا پیا ہا جو تل رکھݨ دی جاء باقی نہ ہئی۔تے اِنوں ہک لمبے چوڑے سٹیج تے شعراء حضرات وی نہ ماندے ہن۔مشاعرے دا باقاعدہ آغاز ساݙے آوݨ توں پہلے تھی چکا ہا۔ کیوں جو سٹیج سیکرٹری ہک ٻہوں چست چالاک‘سنجیدہ تے غیر متنازعہ شخصیت دا مالک ہا۔تہوں اوہ ٻہوں ای سوہݨے تے من موہݨے انداز نال ہر شاعر کوں اوندے مقام تے مرتبے مطابق نمبر وار سٹیج تے سݙ کے مشاعرہ پڑھویندا آیا تے سامعین وی پر سکون تھی کے مشاعرہ سݨدے ٻیٹھے ہن تے ہر اچھے شعر تے شعراء کرام کوں داد وی ݙیندے ٻیٹھے ہن۔پر سٹیج تے ٻیٹھے ہوئے شعراء حضرات کیوں جو ݙو دھڑیں وچ تقسیم تھئے ٻیٹھے ہن‘ تہوں اوہ اپݨی اپݨی پارٹی دے شعراء کوں تاں داد ݙیندے ہن‘لیکن ݙوجھی پارٹی دے شعراء کوں داد ݙیوݨ دے بجائے انہاں تے تنقید تے نکتہ چینی کریندے ٻیٹھے ہن۔پر سئیں! سامعین کوں تاں شعراء دے ݙو دھڑیں دا پتہ اوں ویلے لڳا جݙاں ہک شاعر اپݨے کنوں پہلے پڑھݨ آلے شاعر تے تنقید کریندیں ہوئیں آکھیا جو ایجھیی فحش شاعری ادب اچ شمار نہیں تھیندی‘تے نہ ای ایجھیں ڈھولے ٹپّے تے گیت ادب قبول کریندے۔
ع۔رتی کار والے آ میکوں چاتی جلیں ہا
جھئیں گیت لکھݨ آلے شعراء صرف ادب دا کٻاڑہ ای نہیں پئے کریندے بلکہ نوجوان نسل دے ذہن وی خراب کریندے پئین۔اوہ شاعر اپݨاں مذہبی رنگ دا کلام سݨاکے ٻہہ ڳیا تے ول اِنوں ݙوجھی پارٹی دا شاعر سٹیج تے آیا تے آکھݨ لڳا سئیں ایہ مشاعرہ ہے مجلس نئیں۔اتھاں ہر شاعر کوں اپݨے جذبات دا اظہار کرݨ واسطے آزادی حاصل ہے‘خواہ اوہ مذہبی شاعری پڑھے یا عشقیہ‘سامعین ہر قسم دی شاعری پسند کریندن۔تے ول اوں شاعر اپݨے عشقیہ اشعار پڑھݨ شروع کر ݙتے۔ مشاعرے وچ موجود شعراء نے رنگ برنگی شاعری سݨائی یعنی سنجیدہ‘مزاحیہ‘عشقیہ‘مذہبی علامتی تے مزاحمتی شاعری ۔کہیں شاعر محض دھیمے لہجے وچ اپݨاں کلام سݨایا تے کہیں سٹیج تے آکے دھاڑ دھاڑمچا ݙتی۔ کیوں جو کجھ ساݙے شعراء بھراویں کوں مشاعرہ لُٹݨ دا شوق ہا تہوں انہاں سٹیج تے آکے جذباتی انداز اختیار کر گھدا تے سارے وجود دی ایکٹنگ کر کے تے ہتھ ہوا اچ لہرا لہرا کے سامعین توں داد طلب کیتی۔پر اتھاں ہر شاعر دے کلام دی قیمت سامعین دی سماعت دی کسوٹی اچ تل تل کے پئی تھیندی ہئی۔سامعین ہر شاعر کوں اوندے کلام دے معیار مطابق داد ݙیکے انصاف کریندے ٻیٹھے ہن۔ لیکن گروہ بندی شعراء حضرات جیڑھے جو ݙو ٹولیاں وچ تقسیم تھئے ٻیٹھے ہن انہاں اپݨے مخالف ٹولے دے کہیں ہک شاعر کوں وی داد نہ ݙتی۔بلکہ آخر تے جݙاں ݙو شعراء باقی آن بچے ہن جنہاں دا ݙو مختلف گروہاں نال تعلق ہا سٹیج سیکرٹری جݙاں انہاں اچوں ہک شاعر دا ناں اناؤنس کیتا تاں اوہ شاعر مجبورا ً مائیک تے تاں آڳیا لیکن اندری اندر اوہ ناراض نظر آندا کھڑا ہا انوں اوندے گروپ دے ݙوجھے شعراء وی سٹیج سیکرٹری نال ناراض تھیوݨ لڳ پئے جو ساݙے ایں محترم شاعر دا ایہو مقام ہا کیا؟انہاں مزید آکھیا جو سٹیج سیکرٹری صاحب!جیکوں توں آخر تے پڑھاوݨ چاہندیں اوہ تاں ساݙے ایں محترم شاعر دے پاء اچ وی نہیں۔بحرحال ایں شاعر کوں اوندے گروپ دے شعراء حضرات نے تاں تاڑیاں دی گونج اچ بھر پور داد ݙتی‘لیکن ݙوجھے گروپ دے شعراء میں ݙٹھا ݙوجھے پاسے منہ پھیر کے ٻیٹھے ہن۔تے ول جݙاں ݙوجھے گروپ دا آخری شاعر سٹیج تے آیا تاں اوندے گروپ دے شعراء نے اوندا اٹھی کے استقبال کیتا تے اوندے پڑھݨ ویلے تاڑیاں دی گونج اچ واہ وا تے زندہ باد دے نعرے لڳ ڳئے۔مگر اوندے کولوں پہلے پڑھݨ آلا شاعر تے اوندے گروپ دے باقی شعراء اپݨی اپݨی جاء توں ذرا وی نہ ہلئے۔
حالانکہ اوں شاعر کوں واقعی اوندے صحیح مقام تے پڑھایا ویندا پیا ہا‘جیکوں اوندے گروپ دے شعراء دے نال نال سارا مجمع وی بے ساختہ داد ݙیندا پیا ہا‘لیکن ݙوجھے گروپ دے شعراء حضرات ہر حال اوکوں داد نہ ݙتی تے ٻئے پاسے منہ پھیر ٻیٹھے‘بھانویں جواوندا کلام کتنا ای داد طلب کیوں نہ ہا۔ایں موقعے تے میکوں اپݨی شعراء برادری دا ایہ رویہ ݙیکھ
کے ݙاڈھا ݙکھ تھیا ۔