زوار حسین زاری

اصل ناں       زوار حسین

تخلص           زاریؔ

جمن            1954ء

تعلیم            میٹرک

پیشہ            راج گیری

فون نمبر         0302 7382812

          جاہ پتہ          کہکشاں سٹی نزد کھاد فیکٹری پیراں غائب روڈ ملتان

240صفحیاں تے مشتمل شعری مجموعہ’’ شوق دے پندھ‘‘دے خالق زوار حسین زاری ملتان دا تل وطنی شاعر ہے ،جیکوں اپنْی ماء دھرتی ، ماء بٖولی نال انتہائی محبت ہے ، اوہ اپنْی شاعری وچ ٹھیٹھ سرائیکی زبان استعمال کریندے۔تے سرائیکی شاعری دیاں تقریبًا تمام صنفاں لکھدے ۔ زاری ؔصاحب کوں حضرت جانباز ؔجتوئی دے شاگرد ہوونْ دا شرف حاصل ہے ، آپ دی شاعری وچ کجھ کجھ جانباز دیاں جھلکیاں نظر آندین۔جتھوں تک زاری صاحب دی شخصیت دا تعلق ہے تاں آپ ہک خوش مزاج ملنسار تے پیت پال یاریں دے یار بٖیلی ہن۔ غزل دا نمونہ حاضر ہے۔

(1)غزل

اِتھاں ہر کئی میکوں سوہنْاں پیا مہمان لگٖدا ہے

جے کئی نکھڑے تاں ول دل کوں وڈٖاارمان لگٖدا ہے

توڑے مقسوم ہر گٖئے تاں نہیں کوئی وی اُف کیتی

میڈٖے صبراں اُتے یارو صبر حیران لگٖدا ہے

تیڈٖی دنیا اُتے خالق ڈٖٹھی تقسیم کیجھی ہم

کوئی روٹی کوں سکدا ہے ، کوئی سلطان لگٖداہے

حیاتی دا سفر اصلوں نی آندا راس بٖس جیویں

بِناں تیڈٖے اے جگٖ سارا میکوں ویران لگٖدا ہے

تساں آونْ دی سوچو ہا وڈٖا بے حال زاری ہے

تہاکوں کیوں میڈٖا سانول پرّے ملتان لگٖدا ہے

(2)غزل

ایویں دوستو میں نبھیندا ودا ہاں

انا اپنْی کوں میں بچیندا ودا ہاں

بھُلانواں میں کیویں او گزری وہانْی

او وعدیں دے پتھر ڈھہیندا ودا ہاں

میں ہرگز نی چہندابَنْاں بٖوجھ کہیں دا

میں ہردم ایہو سئیں سوچیندا ودا ہاں

اے کالیں توں آ گٖئین سر وال چِٹے

اجٖنْ تونْیں بھوگٖ اِن بھگٖیندا ودا ہاں

جیڑھے چار ڈٖینہ ہن اے زاریؔ دے یارو

ہمیشہ میں کھل تے کٹیندا ودا ہاں