ریتی شاھی

ریتی قبیلہ ہک قدیم قبیلہ ہے۔ ایہ بلیدی قبیلے دی اصل شاخ ہے۔ کجھ زمانے پہلے ایہ قبیلہ ساحل مکران دا حاکم قبیلہ ہئی۔ جݙݨ سکندر اعظم دا لشکر اتھوں لنڳھیا تاں ایں قبیلے نے سکندر اعظم نال جنگ کیتی۔ ایں جنگ وچ چھ ہزار ریتی ماریے ڳئے تے سکندر دی فوج دا وی وݙا نقصان تھیا، ویہہ ہزار لوک ماریے ڳئے۔ ایں دے بعد سکندر نے آپݨے نمائندے ریتی قبیلے دے سردار کول بھیڄ تے صلح کر ڳھدی۔ ایندے بعد ریتی قبیلے نے سکندر دی فوج کوں رستہ ݙتا۔ ایہ قبیلہ کئی عرصے تک ساحل مکران تے رہیا تے ایندے بعد اتھوں ہجرت کر ڳیا۔ ایہ قبیلہ بلیدی قبیلے دا شاہی خاندان ہے۔ ایں وقت ایہ قبیلہ ایران، افغانستان، عراق، یمن، مصر، اٹلی، شام تے پاکستان دے چاریں صوبیاں وچ آباد ہے۔ ایں قبیلے کوں کئی قبائلی جنگاں وچ وݙے نقصانات تھئے ہن۔

ماندائی قبیلہ

ایہ قبیلہ نوشکی، چاغی، گرم سیل، افغانستان تے ایران وچ آباد ہے۔ شاہنامہ فردوسی دے مطابق نوشیروان عادل دے مرݨ دے بعد انہاں نے آپݨی حکومت بݨا ڳھدی۔ ایں قبیلے وچ سردار خطی خان ماندائی نے بادشاہ ہمایوں کوں پناہ ݙتی ہئی۔ ایہ عمل نہ صرف ماندائی بلکہ پوری بلوچ قوم کیتے باعث فخر ہے۔ 1763ء وچ میر نوری نصیر خان نے ماندائی قوم کوں بادشاہت تے سرداری توں دستبردار کر تے نویں آوݨ آلے اقوام کوں نوشکی وچ وݙے پیمانے تے آباد کر ݙتا۔