ریا سین

ریا سین
(بنگالی : রিয়া সেন)
معلومات شخصیت
پیدائشی ناں	(انگریزی : Riya Dev Sen)
ڄم	24 جنوری 1981ء (44 سال)  کولکاتا
شہریت	بھارت
ماء	مون مون سین
بھیݨ بھرا	رائما سین
عملی زندگی
مادر علمی	جامعہ کلکتہ
پیشہ	ماڈل ،  ادکارہ
پیشہ ورانہ زبان	بنگلہ ،  ملیالم
	IMDB پر صفحہ

ریا سین ہک ہندوستانی اداکارہ تے ماڈل ہے۔ ریا سین ہندوستان دے ہک اداکاریں دے ٹٻڑ وچ پیدا تھئی، ایندی نانی سُچترا سین، ماء مون مون سین تے بھیݨ ریما سین وی اداکارائیں ہن۔ ریا سین نے اپݨی فنی زندگی دا آغاز 1991 وچ فلم وِش کنیا وچ بطور ٻال اداکارہ نال کیتا ہئی۔ ایندی پہلی فلمی کامیابی 2001 وچ ہدایتکار این چندرہ دی کم بجٹ ہندی فلم سٹائل نال تھئی ہئی۔ ایندے علاوہ ایندی ݙوجھیاں قابل ذکر فلماں وچ پروڈیوسر پریتیش ناندے دی ہندی-انگریزی میوزیکل فلم جھنکار بیٹس (2003)، شادی نمبر 1 (2005) تے ملیالم خوفناک فلم انانتھابھادرم (2005) شامل ہن۔

ہک ماڈل دی حیثیت نال ریا سین کوں شہرت اوں ویلےملی جݙاں انہاں1998 وچ سولہ سال دی عمر وچ فالگنی پاٹھک دی موسیقی فلم "یاد پیا کی آنے لگی" وچ کم کیتا ہئی تے تݙاں توں ہݨ تک ریا سین موسیقی فلماں، ٹیلی ویژن اشتہارات، فیشن شوز وچ کم کرݨ دے نال نال مختلف میگزیناں دے سرورق تے وی شائع تھیندی پئی ہے۔ ریا سین نے ہک فلاحی متحرک دے طور تے وی کم کیتا تے ایڈز آگاہی مہم دی موسیقی فلم وچ ایں بیماری دے بارے وچ روایتی نظریات دی نفی کیتے کم کیتا۔ ایندے علاوہ انہاں ٻالیں دے امراض چشم کیتے عطیات جمع کرݨ وچ وی حصہ ڳھدا۔

اداکاری

ریا سین نے 1991 وچ ٻال اداکارہ دی حیثیت نال اپݨے فنی سفر دا آغاز کیتا تے فلم وِش کنیا وچ پوجا بیدی دے بچپن دا کردار ادا کیتا۔ سال 2000 وچ ریا نے 19 سال دی عمر وچ نیشنل فلم ایوارڈ یافتہ ہدایتکار بھرتھراجا دی تامل فلم تاج محل وچ کم کیتا پر کاروباری طور تے ایہ فلم کامیاب نہ تھی سڳی ہئی۔

غیر ہندی فلمیں

ریا سین نے ہندی زبان دے علاوہ ہندوستان دی ݙوجھیاں زبانیں دیاں فلماں مثلاً تیلگو، ملیالم، بنگالی تے تامل وچ وی کم کیتا۔ ایندے علاوہ انہاں انگریزی فلم وچ وی اداکاری کیتی۔

ماڈلنگ

معروف گلوکاریں دیاں موسیقی فلماں وچ ماڈلنگ کرݨ نال ریا سین ہک مشہور تے کامیاب ماڈل بݨ ڳئی۔ جنہاں وچ فالگنی پاٹھک دی "یاد پیا کی آنے لگی" یا "چوڑی جو کھنکی"، آشا بھوسلے دی "جھمکا گرا رے"، جگجیت تے بھوسلے دے "جَب سامنے تم" تے "کہیں کہیں سے"، لتا منگیشکر، بھونسلے تے سنگھ دی "دل کہیں ہوش کہیں"، سونو نگم دی "جینا ہے تیرے لیے" تے شان دی "سوٹا مارو" شامل ہن۔

نجی زندگی تے خاندان

مغربی بنگال دے شہر کلکتہ وچ 24 جنوری 1981 کوں پیدا تھیوݨ آلی ریا سین، ماضی دی معروف اداکارہ مون مون سین دی دھی ہے۔تے بنگالی سینیما دی لیجنڈ اداکارہ سُچترا سین دی ݙوہتری ہے۔ایندی بھیݨ ریما سین وی ہک اداکارہ ہے۔ ریا سین دے پیو بھارت دیو ورما تری پورہ دے شاہی خاندان نال تعلق رکھیندے ہن۔