ریاض قیصرؔ قیصرانْی

اصل ناں    ریاض احمد

قلمی ناں    ریاض قیصرؔ قیصرانْی

جٖمنْ        1963ء

جاہ پتہ      مکان نمبر0/32محلہ عید گاہ شمالی۔لیہ

ریاض قیصرؔ قیصرانْی لیہ دے سر کڈھویں شاعر ہن۔آپ ظلم و استبداد ے خلاف احتجاج کریندے ہوئے نظر آندن۔

نمونہ کلام

؎تمنا سوجھلے دی جے کریسو تاں سحر تھیسی

درندیں دے جگر جیکر چِریسو تاں سحر تھیسی

اساڈٖا خون پئے ظالم غذا دے طور تے پیندن

انہاں کوں زہر دے ساغر پلیسو تاں سحر تھیسی

غزل

پئے گٖیاں بٖئے دے وس نماشاں کوں

کوئی نکھڑے نہ بٖس نماشاں کوں

ڈٖینہ گزاریو چناب دی منْ تے

ہُنْ تاں ٹبٖیاں تے وس نماشاں کوں

کہیں نہ کہیں ویلے آ نکلدا ہا

یاد آندی جو ہس نماشاں کوں

بٖاجھ تیڈٖے تاں شب گزارن دی

کون کھاندا ہے کس نماشاں کوں

اساں پاندھی ہیں پیار دے قیصرؔ

ہجر دے راہ نہ ڈٖس نماشاں کوں

٭٭٭