رگ وید ءِ چ ملتان دا ذکر

ہری یوپیا (ہری یو پی یا ) دے علاوہ رگ وید ءِ چ ݙو ٻئے شہریں دے ناں وی ملدن او ہِن ’’ویل استھان کا ‘‘تے ’’ مہاویل استھا ‘‘۔ انہاں ݙوہیں شہریں دا تذکرہ رگ وید دی پہلی کتاب دے ۱۳۳ ویں گیت  ءِ چ ہے ۔ݙوہیں شہریں دے بارے اندر دیوتا توں استدعا کیتی ڳئی ہے ۔ ’’اے مگھون ! (اندر ) تباہ شدہ شہر ویل استھا تے تباہ شدہ شہر مہاویل استھا ءِ چ جادو گرنیاں دے غول کوں تباہ کر ݙے !‘‘ ۔ اے وی ہے کہ ملتان ماضی بعید ءِ چ اَتے وقفے وقفے نال ہک خود مختار سلطنت دی حیثیت نال اپݨا وجود رکھیندا ریہے ۔ایندی حدود وچ وی مختلف وقت ءِ چ تبدیلی امدی ریہی اے ۔ملتان ، بہاولپور اَتے دیرہ غازی خان دے پہلے آلے ڈویژن تے مشتمل علاقہ انتظامی طور تے پہلے ملتان ئ، چ قائم حکومت دے ماتحت ریہے تے لسانی ، تمدنی اشتراک دا حامل وی رہ ڳے ایں علاقے وچ شہریں تے دیہاتیں کوں وی اپݨے جغرافیائی حالات تے محل وقوع دی وجہ توں اپݨی اہمیت ءِ چ وداھے گھاٹے دا سامݨا ریہا ہے جیندے نتیجے ءِچ انتظامی لحاظ وچ تبدیلیاں امدیاں رہ ڳن ۔تاریخ ءِ چ اے ڳالھ ثابت اے جہ سابق ریاست بہاولپور ملتان دا حصہ ہئی۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء