رِجبی
اساݙی وستی ء ِ چ سال دا سب توں وݙا جلسہ ستاوی رِجب کوں معراج النبی ؐ ہوندا ہا ،جیکوں رِجبی سݙیندے ہاسے ، اے جلسہ ہر سال تھیندا ہا ، رِجب دا چندر ݙسے ہا تے تیاری شروع تھی ویندی ہئی ، جلسے توں ہک یا ݙو ݙینھ پہلے وستی دے چھوکرے پھٹاکے گھندے ہن بݨاوتی پستول دکانیں توں ملدے ہن ،پستول تے ڳٹے گھندے ہاسے ،ہر پاسے ٹھاہ ٹھاہ دیاں آوازاں ہوندیاں ہن، وستی دے وݙے مندے ݙیندے ہن تے اَکھیندے ہن حرامزادو، ستاوی رِجب نیکی تے عبادت دی رات ہے تُساں شغل میلہ بݨا ݙتے ، ناناں سئیں ایں جہاڑے وݙی خیرات کریندے ہن ،ݙو پھنڈراں کُوہیندیاں ہن ، سویل توں کم شروع تھی ویندا ہا ،عصر ویلے خیرات ہلݨ پوے ہا تے عشاء دی بانگ تئیں ہلدی ہئی ،نماز دے بعد نعت خوانی تے تقریراں شروع تھی ویندیاں ہن ،رِجبی تاں اساݙی سنبھل واݨ توں ٻہوں پہلے توں تھیندی اَمدی ہئی ،اساݙے ویلھے وݙی تقریر مولانا عبد الشکور دین پوری دی ہوندی ہئی کئی سال اساں سُنڑدے رہ ڳیوسے ،مولانا صیب فوت تھئے تاں وَل مولانا عبد الکریم ندیم وعظ کرݨ اَمدے ہن ،وسیب دے مولود خواں ساری ساری رات مولود پڑھدے ہن ، دودے آرائیں دی وستی توں حافظ عطاء محمد صیب،امین خان جمالی، اکبر خان جُگلاݨی ، موسیٰ خاں ،کمال دین خان، جمال دین خان اَمدے ہَن ، مقامی نعت خواں وی ہوندے ہن۔رِجبی دا ناغہ نی تھیا نانے سئیں دی وفات دے بعد ماماں بشیر احمد ،ماماں احسان اللہ روایت نہ تروڑی ،ݙوہیں مامیں اللہ کوں پیارے تھی ڳن تے ہُݨ مُلیر عبدالقدیر تے حافظ محمد طاہر ہر سال رِجبی کرویندن تے مسیت دی خذمت وی کریندن ۔تقریراں نعت خوانی تے خیرات اونویں تھیندی اے کیوں جو نانے سئیں دی وصیت ہے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان