رُلیئے تاں ٻے پِن
کوئی مَنے بھانویں نہ مَنے پر سچ ایہ ہے جو ایں ملک دے اصلی حاکم سرکاری افسر اِن ‘ فوج اِچ ہووِن توڑیں سول اِچ ۔ پاکستان اِچ جمہوریت دی پاڑ تے رَنبہ رکھݨ آلے ہک ملک غلام محمد اِسکندر مرزا تے چودھری محمد علی ہَن ‘ ایہ سیاست اِچ اَئے ۔ اِرکاں مار سیاستدانیں کوں پچھیتے کیتا۔ اختیارات کھس اڳوں تے تھی ڳے مولوی تمیز الدین جیہے چنگے بندے عدالتیں چڑھیئے پر ہُنائیں دی کہیں نہ سُݨی ۔ فیصلہ افسر شاہی دے حق اِچ تھیا ‘ وَل ایوب خان دا نونہہ اَڑیا تاں اُوں تھڄوں سیاستدانیں کوں سیاست اِچوں کڈھ ٻاہر کرݨ کیتے قانون لاڳو کیتا ۔ 1956آلا آئین چاتے ہک پاسے کر سَٹیُس ۔ ہِیں آئین موجب جیرھے الیکشن تھیوݨے ہَن او نہ تھیوݨ ݙتونس ۔ ملک تے قوم دے تالُوں تے اَپݨا ہتھ گھاڑواں آئین تھپیُس۔ ݙاہ وِرھیوں تائیں کُٹ کُٹیُس ۔ او ڳیا تاں یحییٰ خان آ ڳیا ۔ گݨگ نشئی ہا ۔ ملک دا وݙا صوبہ اَنج کرا کھڑا ۔ 93ہزار فوجی ہندوستان کنے ڈھکوا۔ بنگلہ دیش بݨوا بے چنتا تھی ۔ کنیں اِچ تیل پا راولپنڈی اِچ آ ٻیٹھا ۔ کہیں نہ پُچھیا جو گِنی ڳٹکیا ۔ اَوترا ‘ بے سنتا ایہ کیا کیتی؟۔ باقی بچیا ‘ برباد ہویا ’’پاکستان‘‘ مجبور تھی تے بھٹو صیب کوں ݙتونے ۔ آپ جو کہیں لیکھے سنبھالݨ جوڳے کائناں ہَن ۔ اُوں بہشتی ‘ بھٹو صیب ‘ اَپݨے رَب دی ݙتی لیاقت ‘ سِݨہپ تے سُدھ سُرت ورتی اپوزیشن کوں نال رَلا ۔ ہمصلاح کر 1973ء دا آئین جوڑیا ۔ ہندوستان نال شملہ معاہدہ کر قید تھے ہوئے فوجیں کوں چُھڑوایا ۔ کھسیا ہویا علاقہ وَلا گھدس اَپݨے ملک اِچ تے ٻاہرلے ملکیں اِچ بھٹو حکومت دیاں پالیسیاں دنیا دے ڈائریکٹ حوالدار امریکہ کوں کائناں وارا کھمدیاں ہَن ۔ سیاست تے دین دھرم دے وݙکیں و ݙیریں کوں وڈھیاں ݙے لُڑھ لاٻا تے فساد پَتونے ۔ اپوزیشن نال ڳالھ مہاڑ تھی ۔ ڳݨ مُنڄ تے راضی نامہ تھیا پر ہک اندر گُندرا تے میسݨا جرنیل ‘ جنرل ضیاء مارشل لاء لا کراہیں حاکم بݨ ڳیا ۔ بھٹو صیب کوں سُولی چاڑھیُس وَل یارہاں وِرہیوں تائیں ’’آئین‘ سیاست‘ سیاستدانیں‘ سیاسی جماعتیں اَتے سیاسی ورکریں‘‘ دے ٻتال ٻلہا ݙتونس ۔ رَب دی پکڑ اِچ آیا پر اوندیاں کیتیاں کرتیاں اَڄݨ تائیں پاکستان اِچ رَہݨ آلیں دے اڳوں اَمدیاں پِن ۔ اَپݨی اَپݨی جھاہ تے ہر کوئی بھوڳ اِچ اے ۔ ایں کنوں وݙا بھوڳ ٻیا کیا ہوسے جو جنرل ایوب دا پُتر گوہرایوب قومی اسمبلی دا سپیکر ہا ‘ ضیاء الحق دا پُتر وزیر ہا تے اوندا ٻالکا ملک دا وزیر اعظم ہا دنیا دی کہیں ٻی قوم کوں وی ایجھی سزا کݙاہیں کتھائیں مِلی اے ‘ پنجاب تے پنجابیں دا تاں ہر ہمیش ڳڑ اِچ رَنبہ ہوندے ۔ رُلیئے تاں ٻے پِن۔
ٻدھ14؍دسمبر1994ء
حوالہ
[لکھو | ماخذ وچ تبدیلی کرو]ٻٹ کڑاک، مصنف: انیس دین پوری۔ ناشر: جھوک پبلشرز ملتان