رَڑھ وَہی
ݙاݙے سئیں دی ڈھیر ساری زمین وِک وِکا ڳئی ہئی باقی جیرھا کجھ بچیا اُو وݙا چاچا جام اللہ وسایارہیندا ہا ،نہری پاݨی تھوڑا ہا ،ٹیوب ویل اڄݨ کائناں آئے ہن،گھر دے نال آلی زمین کھوہ تے پیچدی ہئی ،ٹریکٹر کائناں آئے ہن چاچے سئیں کنیں ݙاند نسلی ہوندے ہن ،مُنہ اَندھارے کوں ݙاندیں کوں پنجالی ء ِچ جوویندے ہن ،پہلاپلو ہَل دا تے ݙوجھا پَٹلے دا ہوندا ہا ،پھُٹی راہوݨ کیتے کھِلے کھِیل تے بِج راہیندے ہن،پہلے پاݨی تے پھُٹیاں ڄا اَمدیاں ہن، نال گھاہ دا کُرڄا وی تھی ویندا ہا ، رَنبا چا تے دَروڳڑیاں ݙیندے ہن،اساں چاچے کوں ݙٹھا جو اُو رَڑھ دی رکھوالی کرینداہاتے رَڑھ واہی دے سارے اَوزار بݨا جوڑ تے رکھدا ہا ،کہی ،وہولا،کُہاڑی، کُہاڑا، ݙاتریاں ،ݙندالی، کھنباݨی، لاکڑا، سب کجھ ہوندا ہا،کم ویلے ݙاݙا سئیں ہُنائیں دے نال تھیندے ہن ،ویلݨے تے ڳڑ تے شکر بنڑدی ہئی ،تھوم وَسل تے سبزیاں وی گھر دیاں ہوندیاں ہن ،ہِک اَدھ واری کجھ داݨے ݙاݙے سئیں ساݙے گھر بھڄوائے تے میݙے ابا سئیں نہ گھدے، آکھیاجو میکوں داݨے نی زمین چہیدی اے ، ݙاڈا سئیں ڈھیر کاوڑ کر ڳیا تے آکھیا پہلے شیت ݙیواں ہا ہُݨ ناں ݙیساں ، اپݨے جیندیں ݙاݙے ابے کوں زمین نہ ݙتی۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان