روہی چولستان وی توں

خواجہ فرید سئیں اپݨے دیوان دی کافی نمبر 132اچ اپݨے خالق حقیقی کوں مخاطب فرما تے آکھدن ’’ میݙا عشق وی توں ، میݙا یار وی توں ، دین وی توں، ایمان وی توں ‘‘۔ ایندے نال نال خواجہ سئیںاپݨے محبوب حقیقی کوں جتھاں بادل، برکھا، کھمݨیاں ، گاجاں ناں نال پکاریے ، اُتھاں روہی چولستان دا ناں وی ݙتے ۔ او روہی یا چولستان کیا ہے ؟ جینکوں خواجہ سئیں رب دا روپ آکھئے، روہی او ماء دھرتی ہے جیندا ذکر خواجہ سئیں دے دیوان اچ جاہ جاہ تے ملدے ۔ روہی دا لفظ روہ یعنی پہاڑ وانگے اُچے ٹٻے ، روہ توں روہی بݨئے ۔چولستان دا ناں کیویں آئے تے ایندی وجہ تسمیہ کیا ہے ؟ ایں بارے تحقیق دی ضرورت اے ، کیوں جو اے پل ݙو پل دی ڳال نی چھ ہزار سال دا قصہ ہے ۔روہی تے وسیب دے لوک عام طور تے درمیان کوں وچال سݙیندن۔ سندھی اچ اینکوں وچالو آکھیا ویندے، آکھیا ویندے چولستان دا لفظ وچال یا وچالو توں بݨئے ۔ سئیں احمد غزالی ایندے نال اے وی اکھیندن جو چولن، چول اور چولی دے نال نال لفظ چیلستان وی ایندی وجہ تسمیہ تھی سڳدے۔ بہرحال ایندی وجہ تسمیہ جو وی ہے روہی تے چولستان ایجھا من بھاوݨا تے شان آلا خطہ ہے جو خواجہ فرید سئیں اپݨے محبوب حقیقی کوں روہی چولستان وی آکھئے ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء