روزِ آدینہ؍جمعہ وار

’’لوٹ کے ٻدھو گھر کوں اَئے۔ ‘‘اَڄ 28؍اگست کوں جمعہ وار ہئی ۔ دِلی وچ ساݙا نانہواں پر آخری ݙینہ ہئی۔ رات کوں راشد مصطفیٰ تے میں شاپنگ توں وَلّے تاں باقی سنگتی آچکے ہِن ۔میں پہلے سامان پیک کیتا اَتے ساریاں کوں سویل کیتے سمان ٻدھݨ دا آکھیا ۔ پاسپورٹ ‘ ویزے ‘ بس دیاں ٹکٹاں ‘ سُوکھڑیاں سنبھالیاں ۔ دِلّی دیاں یاداں کوں کاغذ تے اُتاریا۔ سنگتیاں کنوں ݙینہ دا سفارتخانہ دا حال گھدّا جہڑا میں اُتّے لکھ آئیاں ۔ جلدی سُمݨ کوں جلدی اُٹھݨ دا حوالہ سمجھ کے ٻارہاں وڄے نال سم ڳیوسے۔ سویلے ݙو وڄے اکھ کھل ڳئی ۔ ٻس کچی نندر توں جاڳ پیوسے۔ دھانہ دُھونہ کے سامان بھون دے صحن وچ کٹھا کیتا۔ بھون دے لوکاں کوں ملیوسے ۔ 4:10 تے ٹیکسی آ ڳئی۔ سمان رکھیا تے دِلی دے سُتّے لوکاں کوں رام دے حوالے کیتا۔ بس ٹرمینل گاندھی روڈ تے ہا جیکوں ڈاکٹرامبڈکر ٹرمینل دہلی گیٹ آہدن ۔ اُتھاں پوݨے پنج وڄے پُڄ ڳیوسے۔ کجھ یاتری تے پاندھی آئے کھڑے ہَن۔

ٹرمینل دے ٻاہروں ساݙی پڑتال تھئی تاں اندر ونڄݨ ݙتونے ۔ سمان دا ہک ہک نگ ݙٹھا ڳیا۔ میݙے سمیت جیندے جیندے کول تاج محل دا ماڈل ہا کھول کھول کے ڈٹھونیں ۔ ہک ہندو انسپکٹر ٻہوں اوکھا نظردا ہا ۔ کُھلیّا سمان بند کرݨ اوکھا تھی ڳیاہا ۔ انسپکٹر میݙے کیمرے وچوں سیل کڈھ کے اٹیچی کیس اِچ پا ݙتے اَتے کیمرے ہینڈ بیگ اِچ رکھ ݙتا۔ ہینڈ بیگ وچوں میں چارجر وچ لڳے نویں سیل تاں پا گھدّے پر سارے رستے اوہو انسپکٹر واہگہ تئیں نال آیا تہوں میں کیمرہ نہ کڈھیا۔

اڳلا مرحلہ سمان وزن کراوݨ دا ہا ۔ ݙاہ بندیاں کوں 200کلو سمان دی موکل ہئی۔ ساݙے کول پندرہ ویہہ کلو دا اُردو کتاباں دا ہک ݙٻہ ہا جہڑا جے ۔ سی ۔ بترا گھر وچوں فالتو سمجھ کے ساکوں ݙے ڳئے ہَن ۔ میکوں ݙر ہا جو کتھائیں وزن ودھ نہ ونڄے پر ساݙا سارا سامان 194کلو تھیا ۔ ایندے وچ میلے کپڑے ‘ جُتیاں ‘ ہینڈ بیگ ‘ پاسپورٹ تے ویزیاں دے کاغذات دا وزن وی شامل ہا ۔ مقصد ایہ ہا جو یاتریاں دا سامان ودّھے تے 60/-روپے کلو ماٹھ گھنوں ۔پر اُنہاں دی آس نہ پُڄی۔ سمان وزن کرکے ساݙے ہینڈ بیگ ولا ݙتے ڳئے اَتے پاسپورٹ بورڈنگ کارڈ کیتے گھن گھدونیں۔ بورڈنگ لائونج کن ونڄݨ ویلے ولا ساݙی پڑتال کتونیں۔ موبائل آن کرا کے ݙٹھے ڳئے حالانکہ اساں تاں ٻاہر گیٹ توں ‘ ولا سکیورٹی دروازے توں لنگھ کے آئے ہاسے۔ برحال ہندوستانی عملے دا رویہ کجھ چنڳا نہ ہا (شیت صرف پاکستانیاں نال) میݙے کنوں تاں انسپکٹر نے میݙا ناں وی پُچھیا ہا ۔ پتہ نھیں کیوں۔

انڈیا دی ٹکٹ تے لکھیا ہوئے جو زائد وزن وی15کلو توں ودھ نہ ہووے اَتے اوہ وی جاء ہوئی تاں رکھݨ ݙیسوں نھیں تاں کوئناں ۔ حالانکہ میں انڈیا آوݨ ویلے ݙٹھا جو ہک ہندوستانی تریمت 60کلو توں ودھ سمان چا کے آئی ہئی ۔ عملے دی رَلّت نال اوندے اُتّے کرایہ وی نہ لڳا ہا ۔ میں محسوس کیتا جو ہندوستانی عملہ سارے پاکستانیاں کوں شک دی نگاہ نال ݙیہدے ۔ ایندے پِچھ ݙٹھ (پس منظر)وچ بمبئی دا تاج محل ہوٹل دا واقعہ تھی سڳدے ۔ راولپنڈی دا ہک پاکستانی یاتری جہڑا ساݙے نال ہندوستان آیا واپسی ویلے وی میݙے نال دی سیٹ تے ٻیٹھا ہا ۔ اوہ بمبئی توں تھی کے آیا ہا ۔ اُوں ݙسیّا جو بمبئی دے کئیں ہوٹل ساکوں دھانوݨ کیتے وی کمرہ نھیں ݙتا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان