رمضان عاطف

اصل ناں       محمد رمضان

قلمی ناں       رمضان عاطفؔ

ڄمݨ           1980ء

تعلیم          میٹرک

پیشہ           حکمت

جاہ پتہ         بھرمی چراغ شاہ تحصیل و ضلع بھکر

رمضان عاطفؔ ضلع بھکر دے نمائندہ شاعر ہن ، سرائیکی شاعری دیاں تقریبَََا ساریاں صنفاں لکھدن۔آپ دے چار شعری مجموعے ’’عاطف دے ݙوہڑے‘‘،’’ اکھ دا ماتم‘‘،’’ سچ دا سینہ‘‘ تے ’’ساہ دی موکھ‘‘ وی چھپ چکے ہن۔رمضان عاطف ؔ موزوں طبع فطری شاعر ہے ،جیڑھا نتری ہوئی زبان وچ خوبصورت لٻ ولہجے دی رواں شاعری کریندے ۔جتھوں تک آپ دی غزل دا تعلق ہے تاں چھوٹی بحر دی غزل لکھدے۔تے اپݨی غزل وچ سیاسی ، سماجی  تے معاشرتی مسائل شاعرانہ رنگ اچ وݙی ہنر مندی نال پیش کریندے۔نمونہ کلام حاضر ہے۔

غزل

گنگی وستی دے ارمان گنگے ملئے

شہر تیݙے دے انسان گنگے ملئے

چپ چپاتی حیاتی نبھیندے ودن

ساکوں نسلیں دے اگٖوان گنگے ملئے

ریت رسماں توں جند وار ݙیندے جیڑھے

لوک ایجھیں وی نادان گنگے ملئے

خان سوہݨاں سلامت رہیں توں سدا

ساکوں توں، تیݙے امکان گنگے ملئے

اساں شاید ترقی تہوں نئیں کیتی

ساݙیاں سوچاں کوں سلطان گنگے ملئے