رمضان شریف

رمضان شریف دے علاوہ ہر جمعے کوں  تقریراں  تے نعت خوانی تھیندی ہئی ، اُوں  ویلے پرے پرے تئیں  کُئی وݙی مسیت یا مدرسہ کائناں  ہوندا ہا ،سارے لوک اساݙی وستی اَمدے ہن ،اساݙے علاقے دے نعت خوان حافظ عطاء محمدآرائیں ، موسیٰ خان جمالی، اکبر خان جُگلانی ،کمال دین خان جمال دین خان جمالی، اللہ بخش خان دھریجہ، امین خان جمالی تے میݙے ابا سئیں  نعتاں  پڑھدے ہن، ٻے وی ڈھیر ہن پر ڈھیر سارے ناں  میݙے چیتے وِچ کائنی ، میݙے نانا سئیں  دیو بندی خیال دے ہن باقی ساری وستی تے علاقے دے لوک بریلوی ہن ، مولود شوق نال سُنڑیے ویندے ہن ،وستی دے سارے جنازے نانا سئیں  پڑھیندے ہن تے جنازے دے بعد دُعا وی منگویندے ہن،قلیں  تے وی ویندے ہن ، دھریجہ نگر دی ایہا روایت ہُݨ وی برقرار ءِ۔ماماں  احسان اللہ کوں  فرقے دے کجھ لوکیں  آکھیا توں  ایویں  نہ کیتا کر، اوں  آکھیا میݙا ابّا کریندا ہا میں  وی ایویں  کریساں ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان