رمضان

ماہ رمضان (رمضان عربی زبان دا لفظ ہے) ہجری تقویم دا ناواں مہینہ ہے جیہڑا شعبان دے بعد آندے۔ مسلمانیں دے نیڑے ایہ مہینہ ٻیاں ہجری مہینیاں دی نسبت ٻہوں خصوصیت تے مقام آلا سمجھیا ویندے۔ ایں مہینے وِچ اسلام دا ہک اہم رکن روزہ رکھا ویندے۔ روزے دے ݙینہاںوِچ فجر توں سورج دے بݙݨ تک کھاوݨا پیوݨا منع ہوندے۔ ایں مہینے وچ مسلمانیں دی مقدس کتاب قرآن مجید مکمل تھئی۔

رمضان دے مہینے دا آغاز 29 شعبان کوں چندر ݙیکھݨ دے بعد تے چاند نظر نہ آوݨ دی صورت وچ 30 شعبان دے بعد تھیندے۔ اڳلے ݙینہہ پہلا رمضان ہوندے۔ رمضان دے ختم تھیوݨ دے بعد مسلمان عید الفطر منیندن۔

رمضان دی اصل

رمضان دا ناں زمانہ جاہلیت وچ وی موجود ہئی تے مہینے دے ناں دے طور تے استعمال تھیندا ہئی۔ رمضان عربی زبان دا لفظ ہے، ایندے معنی ٻہوں گرمی دے ہن۔ جݙݨ ایندا ناں رکھیا ڳیا ہئی، اوں ویلے ٻہوں گرمی دا موسم ہئی، ایں واسطے ایندا ناں رمضان رکھ ݙتا ڳیا۔

اسلام وِچ رمضان دی اہمیت

اللہ رب العزت نے قرآن مجید وِچ فرمایا:

"شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ فَمَن شَهِدَ مِنكُمُ الشَّهْرَ فَلْيَصُمْهُ وَمَن كَانَ مَرِيضًا أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللّهُ بِكُمُ الْيُسْرَ وَلَا يُرِيدُ بِكُمُ الْعُسْرَ وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ"

ترجمہ:

"رمضان دا مہینہ (اوہ ہے) جیندے وچ قرآن لہایا ڳیا ہے، جیہڑا لوکیں کیتے ہدایت ہے تے (جیندے وِچ) رہنمائی کرݨ آلی تے (حق تے باطل وِچ) امتیاز کرݨ آلی واضح نشانیاں ہن۔ پس تساں وچوں جو کوئی ایہ مہینہ پا ڳھنے، اوہ ایندے روزے ضرور رکھے تے جیہرا کوئی بیمار ہووے یا سفر تے ہووے، تاں ٻیاں ݙینہاں (دے روزیاں) نال گنتی پوری کرے۔ اللہ تہاݙے نال آسانی چاہندے تے تہاݙے نال دشواری نہیں چاہندا۔ تے ایں واسطے جو تساں گنتی پوری کر سکو تے ایں واسطے جو اللہ نے تہاکوں جیہڑی ہدایت ݙتی ہے، ایندے تے اللہ دی بڑائی بیان کرو تے ایں واسطے جو تساں شکر گزار بݨ ونڄو۔"