رمزی یوسف

رمزی یوسف یا رمزی محمد یوسف دا ڄماندرو ناں عبد الباسط کریم ہے۔ اوہ ٻہوں سارے ناواں نال ڄاݨیے ویندن۔ رمزی یوسف کویت وچ ہک پاکستانی فلسطینی گھراݨے وچ ڄمیے۔ 1993ء وچ تھیوݨ آلے ورلڈ ٹریڈ سینٹر بم دھماکے دا الزام انہاں تے ہے۔ اوہ 1995ء وچ اسلام آباد وچ القاعدہ دے ہک خفیہ ٹھکانے توں پاکستانی حکام دے ہتھوں گرفتار تھئے تے ولا انہاں کوں امریکی حکام دے حوالے کر ݙتا ڳیا۔ انہاں نے امریکی عدالت وچ اپݨے تے لائے ڳئے الزامات کوں قبول کیتا تے انہاں کوں زندگی بھر دی قید دی سزا ݙتی ڳئی۔ رمزی یوسف دے چاچا خالد شیخ محمد وی القاعدہ دے ہک سینئر رکن ہن جیہڑے بعد وچ گرفتار تھئے۔

سوانح حیات

رمزی یوسف کویت وچ ڄمیے۔ انہاں دے پیو تے چاچا خالد شیخ محمد دا تعلق بلوچستان، پاکستان نال ہئی۔ انہاں دی اماں ہک فلسطینی خاتون ہن۔ انہاں دے پءو ہک انجینئر ہن جیہڑے کویتی ہوائی کمپنی کیتے کم کریندے ہن۔ زمانہ طالب علمی وچ اوہ تاریخ تے انگریزی ٻولی وچ کافی عبور رکھیندے ہن۔ اوہ انگریزی، عربی، اردو، عبرانی تے بلوچی زباناں ٻولیندن۔ انہاں نے اپݨی الیکٹریکل انجینئرنگ دی ڈگری West Glamorgan Institute (جو ہݨ Swansea Metropolitan University ہے)، Swansea, Wales توں حاصل کیتی تے مصر دے ہک اسلامی ادارے توں عملی زندگی دا آغاز کیتا۔