رفیع پیر

رفیع پیر (1900-1974) پاکستان دے نامور ڈراما نگار، صدا کار اتے اداکار ہن۔ او 21 مارچ 1900ء کوں پیدا تھئے۔ انہاں دے ݙاݙا ، چاچا اتے پیو سب گورنمنٹ کالج لاہور دے پڑھے ہوئے ہن اتے رفیع پیر نے وی ایں کالج وچ داخلہ ڳھدا۔ پر تحریک عدم تعاون اتے جلیانوالہ باغ دے واقعے دی وجہ توں انہاں کالج چھوڑ ݙتا۔

1916ء وچ او قانون دی اعلیٰ تعلیم کیتے اوکسفرڈ ڳئے اتے ول 1919ء وچ جرمنی چلے ڳئے جتھاں انہاں ہائیڈل برگ یونیورسٹی وچ فلسفے دی تعلیم حاصل کیتی۔ چار سال ہائیڈل برگ وچ گزارݨ دے بعد او برلن چلے ڳئے۔

واپس آ کے انہاں آل انڈیا ریڈیو لاہور ٹیشݨ نال کم شروع کر ݙتا۔ اتھاں انہاں ٻہوں سارے ڈرامے کیتے۔ او ڈرامے لکھدے وی ہن، ٻولیندے وی ہن اتے اداکاری وی کریندے ہن۔ لاہور اتے دہلی ٹیشݨ توں انہاں دا ٻہوں لمبا تعلق ریہا۔ 1946ء وچ انہاں فلم نیچا نگر وچ کم کیتا جیندے کوں کینز فلم فیسٹیول وچ انعام وی ملیا۔ انہاں ریڈیو کیتے ٻہوں سارے ڈرامے لکھے جنہاں وچ "اکھیاں" ٻہوں مشہور ہئی۔ اے پنجابی دا پہلا ریڈیو ڈراما ہئی۔ اکھیاں دے علاوہ انہاں "کوڑے گھٹ" اتے "جدوں ساریاں آساں ٹٹ گیاں" جاہیں ڈرامے وی لکھے۔ آخری ڈراما انہاں ٹیلی ویژن کیتے لکھیا ہئی جݙݨ انہاں دی بینائی ویندی رہی ہئی اتے اے ڈراما انہاں اپݨے ٻالاں کوں املا کروا کے لکھوایا ہئی۔

مجلس ترقی ادب لاہور نے انہاں دے ڈرامیاں کوں "رفیع پیر کے ڈرامے" دے ناں نال کتابی شکل ݙتی ہے۔ انہاں دا انتقال 11 اپریل 1974ء کوں لاہور وچ تھیا۔