رضوانہ تبسم درانی۔ سرائیکی شعر وادب دا نویکلا تے معتبرحوالہ

سئیݨ رضوانہ تبسم درانی سرائیکی وسیب دی ہک اینجھی خوش نصیب تخلیق کار ہِن جنہاں کوں اللہ سوہݨے ڈھیر سارے ڳݨاں اَتے اعزازات نال نوازیے ۔ او بیک وقت ہک کامیاب شاعرہ ، نثر نگار ، براڈ کاسٹر ، سماجی کارکن اَتے محقق ہِن۔ اُنہاں کوں سرائیکی دی پہلی سرائیکو دے مجموعے ’’ ٻانہہ وچ ٻدھے ڳانے‘‘ دی لکھاری ہووݨ دا اعزاز حاصل ہے ۔ ایندے نال نال او پہلی سرائیکی گیت نگار خاتون (جنہاں دا گیتاں دا مجموعہ ’’وِچھڑے یاد جو اَئے ہوسن‘‘ وی اَجھو چھپݨ آلا ہے )وی ہِن۔ انہاں دے تقریباً 60 گیت ریڈیو پاکستان دے مختلف گلوکاراں دی آواز اِچ ریکارڈتھئین۔ ایہ اعزاز وی ٻیا کہیں خاتون گیت نگار کوں حاصل نئیں تھی سڳیا۔

شاعری دے نال نال اُنہاں نثر آلے پاسے وی توجہ کیتی اے ۔ اُنہاں دا پہلا افسانوی مجموعہ ’’سُکے پتراں دا ݙسکار‘‘ تہاݙے ہتھاں وچ ہے۔اے افسانے اصل وچ سرائیکی وسیب دیاں سچیاں کہانیاں ہِن، جنہاں کوں سئیݨ رضوانہ تبسم درانی لوظاں دا چولا پواء کراہیں تہاݙے سامݨے پیش کیتے ۔اے افسانے اُنہاں وسیب دی وستی وستی ، ڳوٹھ ڳوٹھ، پھر تے کٹھے کیتن۔ جیڑھے انہاں دے گہرے مشاہدے ، دھرتی نال جُڑت ، اَتے بیان دی قدرت تے نُدر ت کوں نشابر کریندن ۔ انہاں افسانیاں وچ تہاکوں ہک تریمت دی نظر نال تریمت دے ݙکھ ، درد ، مونجھاں اَتے سِکاں ݙیکھݨ کوں مِلسن ۔ انہاں جیڑھے سوہݨے انداز نال اِنہاں سچیاں کہانیاں کوں افسانے دا روپ ݙتے ،ایندے نال انہاں دی فنی پختگی اَتے مہارت دے نال نال دلی جذبات اَتے احساسات دی عکاسی وی مِلدی ہے۔

رضوانہ تبسم درانی سرائیکی وسیب دے مہاندرے شاعراں وچ تاں پہلے وی ڳݨیے ویندے ہَن ۔ ایں افسانوی مجموعے دی اشاعت دے بعد او سرائیکی نثر نگاراں دی صف اِچ وی شامل تھی ڳن ۔ انشاء اللہ انہاں دے اے افسانے سرائیکی نثر نگاری وچ ہک جاندار تے شاندارودھارا ثابت تھیسن۔

ڈاکٹر عصمت اللہ شاہ

صدر نشیںشعبہ سرائیکی

گورنمنٹ ایس ای کالج بہاول پور

حوالہ

کتاب: سُکے پتراں دا ݙُسکار، رضوانہ تبسم درانی ، چھپیندڑ: جھوک پبلشرز ملتان