رشید خان قیصرانْی

1930ء تا 2010ء

رشید خان قیصراݨی 13دسمبر1930ء کوں سردار شیر بہادر خان دے گھر قصبہ کوٹ قیصراݨی تونسہ شریف اچ پیدا تھئے۔اپݨی تعلیم مکمل کر کے1953ء کوں پاک ٖ فضائیہ وچ بطور ونگ کمانڈر تعینات تھئے۔تے ول 33سال اپنے فرائضِ منصبی سرانجام ݙیوݨ دے بعد 1986ء وچ ملازمت توں ریٹائر تھی ڳئے۔

رشید خان دا تعلق تمن قیصراݨی دی سردار فیملی نال ہا۔ جتھوں تک آپ دی شاعری دا تعلق ہے تاں آپ اردو، فارسی تے سرائیکی دے سہ زبان شاعر ہَن ۔اردو شاعری دے حوالے نال آپ دا شمار پاکستان دے بلند پایہ شعراء وچ تھیندے،سرائیکی آپ دی مادری زبان ہئی ، سرائیکی اچ وی خوب صورت شاعری کریندے ہَن ۔بلکہ اپݨی اردو شاعری وچ سرائیکی دے الفاظ وݙی سلیقہ مندی نال فِٹ کر ݙیندے ہَن۔جݙاں جو آپ دی اردو شاعری وچ وی سرائیکی کلچر دی خوشبو آندی ہے۔رشید خان کئی شعری کتاباں دے صنف ہَن۔آخر 21جون2010ء کوں آپ 80سال دی عمر وچ وفات پا ڳئے۔نمونہ کلام حاضر ہے۔

غزل

کھمدے گجدے بدلاں دیوچ تیݙے رُخ دے لشکارے

اساں تتی ریت دے واسی ساݙے نال نہ ہاسہ کر

کے تئیں ٹُرسی سجھ دی سنگت کے تئیں رہسی دُھپ دا سیک

اپݨے ݙینہ ݙوپہر تے ڈھولا نہ اتنا بھرواسہ کر

ساݙیاں ساریاں سکاں ، سدھراں ،آس اُمیداں تیݙے ناں

دل دا سارا سونا چا گھن یار نہ تولہ ماسہ کر

اُݙدے وقت دا پکھی آخر لہہ ڳئے لہندے سجھ دے نال

توں وی اپݨی ساہ دی ڳنڈھڑی چا کے یار دا پاسہ کر

یار رشیدؔ اوں در دا ککھ وی لکھ توں چنڳاں لکھاں وار

ایہو ککھ ہئی چم کے چا گھن نہ اتنا ہِٻلاسہ کر