رحیم طلب .ڄاݨ سُنڄاݨ
ج: 1962ء
رحیم طلب دا ناں رحیم بخش چوہان اے ۔ انھاں ایم اے اُردو، ایم اے سرائیکی تے ایم اے انگریزی کیتی ا ے۔احمد پورشرقیہ دے محلہ فتانی اچ 1962ء اچ پیدا تھین۔ رحیم طلب غریب گھر دا جوان اے تے حیاتی نال لمبی جنگ لڑی ہس ۔ اَڄکل محکمہ تعلقات عامہ لودھراں اچ آفیسرہن ۔ بے پناہ لکھدن ساد مُرادے بندے ہن۔ شاعری وی اُنویں کریندن۔ ویسے یاراں دے یارہن لکھݨ پڑھݨ دا کم ٻہوں کریندن،انھاں دیاں درج ذیل کتاباں چھپ ڳن۔
(۱)پیار دا پہلا ساوݨ (۲)سخن فرید دا(۳)زمین اسمان (۴)آکھیا مبارک شاہ (۵)فرام دا ستلج بنک(۶)ایہوای سچ اے (۷)طلب دا پیار
طلب غزل وی لکھی ہے ۔ غزل بھانویں جو بالکل سدھی اے ول وی تبرک دے طور تے ݙتی ویندی پئی اے تانکہ سندرارَہے۔
؎ مر ونڄوں تاں جگ یاد رکھے طلب
پیدا بھوئیں اُتے ایجھی سونہہ کر ڄلوں
٭ بمطابق شناختی کارڈ ، ملاقات شاعر ، بمقام دفتر تعلقات عامہ لودھراں۔2فروری2012ء
کلام ٭
(1)
یار رُس تے جُدا تھیوے تاں غزل تھیندی ہے
درد ہجراں دی سزا تھیوے تاں غزل تھیندی ہے
کَٹھے جِیسوں کٹھے مرسوں جاں سڄݨ ایہ آکھیا
رَتڑے لب توں جے ادا تھیوے تاں غزل تھیندی ہے
اُوندا رنگ روپ ہے سارے جگ توں بھانویں وکھرا
سوہݨیاں توں جے گناہ تھیوے تاں غزل تھیندی ہے
حُسن جیویں جو اَنا دے خول اچ پلدے
عشق وی خود سڑ تے سُوا تھیوے تاں غزل تھیندی ہے
دِل دے روگاٖں دا طلب کتھاں تھیندا ہے علاج
حُسن خود آپ دَوا تھیوے تاں غزل تھیندی ہے
(2)
کیوں ݙر تے ݙڈھپ توں مُنہ کر ڄلوں
کیوں نہ ویری دے سینے کوں کھو کر ڄلوں
جے ونڄݨا ہے پار تاں کیوں پُچھدیں لانگھے !
آ ‘ ایں جبر دے دریا اچ دھو کر ڄلوں
ٻانہہ چھک سٹوں ظالم دی مونڈھے کنوں
اتے ظالم دے مونہہ کوں دُھوں کر ڄلوں
مر ونڄوں تاں جگ یاد رکھے طلبؔ
پیدا بھوئیں اُتے ایجھی سونہہ کر ڄلوں
(3)
ساری ساری رات دل کوں وِپرے تیݙے کھاندے ریہے
موتی بݨ ہنجوں میݙے کِردے ریہے ڈہاندے ریہے
ویندے ویلے نی ݙٹھا اُوں جو میکوں ہک نظر
واہمے کئی کئی دل وچ آندے ریہے جاندے ریہے
کوڑے جگ توں لحظہ وی ‘ ݙکھاں توں نہ واملی
میل ݙکھ دے تھیندے ریہے سُکھاں توں نت واندے ریہے
سوہݨے سڄݨ دی یاد وچ دُکھدے ریہوسے رات ݙینہہ
کئی کئی روڳ من وچ پَلدے ریہے ساہندے ریہے
روڳ بݨ ڳئی تیݙی طلب ؔ مونجھاں تھیاں سِر تار ہن
جے تئیں بُت اچ ساہ ریہے مونجھے ریہے ماندے ریہے
٭ کلام شاعر دی ڈائری اِچوں گھِدا گئے، بمطابق بیاض شاعر
حوالہ
[لکھو | ماخذ وچ تبدیلی کرو]کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان