رحیمداد خان مولائی شیدائی

رحیمداد خان مولائی شیدائی پاکستان نال تعلق رکھݨ آلے سندھی ٻولی دے نامور مؤرخ، صحافی تے مترجم ہن۔ اوہ اپݨی کتاب "تاریخ تمدن سندھ" تے "جنت السندھ" دی وجہ توں مشہور تے معروف ہن۔

حالات زندگی

رحیمداد خان مولائی شیدائی 26 اپریل 1894ء کوں سکھر، سندھ، برطانوی ہندوستان (موجودہ پاکستان) وچ ڄمیے۔ انہاں دا اصل ناں میر رحیم داد خان ہئی۔ 1913ء وچ ریلوے وچ ملازمت اختیار کیتی جتھاں اوہ کلینر، فائرمین، ٹرین کلرک، یارڈ فورمین، سیکنڈ گارڈ تے فیر گارڈ مقرر تھئے۔ 1939ء وچ محکمہ ریلوے توں سبکدوشی اختیار کیتی۔ 1934ء وچ مولائی شیدائی دا پہلا مضمون شائع تھیا جیندا ناں "ممتاز محل" ہئی۔ ایہ مضمون دین محمد وفائی دی نظر توں گزریا تاں انہاں نے مولائی شیدائی کوں مزید لکھݨ دی ترغیب ݙتی۔ ریلوے وچ ملازمت دے دوران انہاں دے مضامین "ستارہ سندھ"، "توحید"، "الوحید" تے "سندھو" ناں دے اخبارات وچ مولائی شیدائی دے قلمی ناں نال شائع تھیندے ہن۔ ایہ قلمی ناں دین محمد وفائی تے پیر علی محمد راشدی نے رکھیا ہئی۔ 1941ء وچ وزیر اعلیٰ سندھ خان بہادر اللہ بخش سومرو دے اخبار "روزنامہ آزاد" دے سب ایڈیٹر مقرر تھئے۔ روزنامہ آزاد کانگریسی اخبار ہئی، ایں سانگے انہاں نے علیدگی اختیار کر کے 1945ء وچ "روزنامہ ہلال پاکستان" حیدرآباد دے ایڈیٹر مقرر تھئے۔ 1950ء وچ سندھ یونیورسٹی وچ ریسرچ فیلو مقرر تھئے جتھاں اوہ پنڄ سال تک رہے۔ انہاں دی تصانیف وچ "جنت السندھ"، "تاریخ تمدن سندھ"، "مختصر تاریخ بلوچستان" تے "تاریخ قلات" خاص کر مشہور ہن۔

تصانیف

• جنت السندھ
• تاریخ تمدن سندھ
• تاریخ اسلام
• مختصر تاریخ بلوچستان
• تاریخ قلات
• بلوچستان وچ مہدوی تحریک
• تاریخ ہند و پاک (ترجمہ)
• روضۃ السندھ
• موسوین جی مختصر تاریخ
• تاریخ خاصخیلی
• مقالات شیدائی (4 جلدیں)
• تاریخ سکھر (سندھی)

وفات

رحیمداد خان مولائی شیدائی 12 فروری 1978ء کوں سکھر، پاکستان وچ وفات پا ڳئے۔ اوہ سکھر وچ ٹیکری آدم شاہ وچ سپرد خاک تھئے۔