رحمان ڈکیت

کراچی دے علاقے لیاری وچ موجود ہک انڈر ورلڈ گینگ دے سربراہ۔ رحمان "ڈکیت" ایرانی بلوچ ہن تے انہاں دے پیو دا ناں داد محمد بلوچ ہئی۔ مقامی لوکیں دے مطابق داد محمد دی ترائے شادیاں ہن تے رحمان انہاں دی تریجھی ذال دی اولاد ہن۔ رحمان لیاری دا تعلق ہک متوسط گھراݨے نال ہئی جیہڑا انڈر ورلڈ دی دنیا وچ اپݨی جوانی توں پہلے ہی آ ڳئے ہن۔ انہاں دی اپݨے گروہ تے مضبوط گرفت ہئی۔ انہاں نے اپݨے پیو دی طرح ترائے شادیاں کیتیاں ہن۔ رحمان دے ٻالیں دی تعداد ستارہاں دے قریب ݙسی ویندی ہے۔ جرائم تے انڈر ورلڈ گینگ دی لڑائی دے بعد رحمان نے اپݨا اثر لیاری توں ٻاہر ملیر تے کورنگی دی طرف ودھاوݨا شروع کیتا تے شہر وچ علاقائی سطح تے انہاں دا مقابلہ ݙوجھے انڈر ورلڈ گینگ دے گروہاں نال تھیندا رہیا۔ رحمان بلوچ تے الزام ہئی کہ اوہ ڈکیتی سمیت ہک سو توں زیادہ جرائم وچ ملوث ہن۔ حکومت سندھ نے انہاں دے سر تے پنڄھاہ لکھ روپے دا انعام مقرر کیتا۔

ݙوجھا رخ

رحمان کراچی دے انڈر ورلڈ دا ایں طرح دا کردار ہئی جنہاں دی زندگی دے کئی پہلو متنازعہ رہے ہن۔ اوہ فلمیں دے ہیروز دی طرح جرائم توں کمائی ڳئی دولت اپݨے علاقے دے غریباں وچ ونڈݨ کیتے مشہور ہئی۔ سن 2008، 2009 وچ رحمان "ڈکیت" نے اپݨی ہک الگ حیثیت بݨائی۔ انہاں نے اپݨے آپ کوں سردار عبد الرحمان بلوچ دے نام نال متعارف کرواوݨا شروع کیتا۔ رحمان "ڈکیت" اگر انڈر ورلڈ دے گرو ہن تاں سردار عبد الرحمان علاقے دی سیاسی شخصیت بݨ ڳئے۔ اوہ لیاری وچ قائم تھیوݨ آلیاں امن کمیٹیاں دے نگران رہے۔ رحمان بلوچ نے اپݨے آپ کوں حکمران جماعت پیپلز پارٹی نال منسوب رکھیا۔

ہلاکت

9 اگست 2009 کوں رات کوں ہک پولیس مقابلے وچ رحمان بلوچ عرف رحمان ڈکیت کوں ترائے ساتھیاں سمیت ہلاک کر ݙتا ڳیا۔ ایں توں پہلے رحمان بلوچ دی کوئٹہ توں گرفتاری دی خبراں آئی ہن تاہم بعد وچ آکھیا ڳیا کہ اوہ پولیس دی حراست توں فرار تھی ڳئے ہن۔ ایں ساہنڳے ایں مقابلے کوں جعلی پولیس مقابلہ وی آکھیا ویندے۔ رحمان بلوچ عرف "ڈکیت" کوں کراچی وچ پولیس مقابلیاں کیتے مشہور افسر چودھری اسلم دی پارٹی نے ہلاک کیتا جیہڑے شہر وچ تھیوݨ آلے سنہ 1990 دے آپریشن دے واحد زندہ پولیس افسر ہن۔ ماضی دے ایں آپریشن وچ حصہ گھنݨ آلے باقی تمام اہم پولیس افسریں کوں ٹارگٹ کلنگ وچ ہلاک کیتا ڳیا ہے۔ بلوچ دی ہلاکت دے بعد لیاری وچ حالات کشیدہ تھئے۔ انہاں دے جنازے وچ ہزاراں لوکیں نے شرکت کیتی۔ کیوں جو اپݨے علاقے وچ انہاں کوں ڈاکو توں زیادہ ہک ہیرو دی حیثیت حاصل ہئی۔