رانی بھبانی

رانی بھبانی
معلومات شخصیت
پیدائش	سنہ 1716ء   بوگرا
وفات	سنہ 1795ء (78–79 سال)  ناٹور ضلع
اولاد	رام کرشنا رائے

رانی بھبانی (بنگالی: রাণী ভবাণী) (1716ء–1795ء) ہِک ہندو زمیندار زنانی ہَن، جنّھاں کوں، برطانوی نوآبادیاتی دَور وِچ نتور دی ملکہ دے ناں نال وی ڄاتا ویندا ہئی، جو ہُݨ راجشاہی، بنگلہ دیش وِچ ہِے۔ انّھاں دی شادی نتور ریاست دے زمیندار مہاراجا رام کانتا موئترا (رے) نال تِھئی ہئی۔ راجشاہی راج یا ریاست نتور ہِک وݙی زمینداری ہئی جیڑھی بنگال دے ہِک وسیع علاقے تے قابض ہئی۔ ریاست نتور دا رقبہ تقریباً 34,000 کلومربع میٹر (13,000 مربع میل) ہئی۔ تے اِیندے وِچ نہ صرف شمالی بنگال دا وَدھ حصہ شامل ہئی بلکہ بعد وِچ مرشد آباد، نادیہ، جیسور، بیر بھوم تے بردوان دے انتظامی ضلعیاں تے مشتمل علاقیاں دے وݙے حصے وی شامل ہَن۔ آپݨے شوہر دی موت دے بعد، نتور راجباری دی رانی بھبانی نے جائداد تے محل ݙوہاں کوں وݙا کِیتا۔

سوانح

بوگرہ ضلع دے ڳاؤں چھتم گرام دے براہمن خاندان وِچ ڄَمّی ہَن، انّھاں دے پیو دا ناں اتمارام چودھری ہئی۔ بھبانی دی شادی اُوݨ دَور دے راجشاہی دے زمیندار راجا رام کانتا موئترا (رے) نال تِھئی ہئی۔ اِیندی موت دے بعد، بھبانی جور زمیندار بݨ ڳئی تے اِین٘دے کوں رانی یا ملکہ آکھیا ویندا ہئی۔ اوہ اردھبنگیشوری دے ناں نال مشہور ہَن۔ زمیندار دی حیثیت نال عورت اُوݨ ݙین٘ہاں وِچ ٻہوں گھٹ ہَن، پر رانی بھبانی نے چار دہائیاں توں وَدھ عرصے تئیں وسیع ترین راجشاہی زمینداری کوں انتہائی مؤثر طریقے نال سنبھالیا۔ ہِک انگریز مصنف جان ہول ویل نے قیاس کِیتا جو تاج کِیتے ریاست دا مقررہ سالانہ کرایہ 7 ملین روپے ہئی، اصل آمدنی تقریباً 15 ملین ہئی۔

پر، جیڑھی ڳالھ نے رانی بھبانی کوں عام لوکاں وِچ ہِک گھریلو ناں بݨا ݙِتّا اوہ انّھاں دی انسان دوستی تے عمومی سخاوت ہئی، جیندے نال ہِک سادہ ذاتی حیاتی ہئی۔ خیال کِیتا ویندا ہئی جو پورے بنگال وِچ اِیں جتنے مندر، سرائے تے سڑکاں بݨائین اُنّھاں دی تعداد سینکڑاں وِچ ہِے۔ انّھاں نے آپݨی رعایا دے پاݨی دے شدید مسئلے کوں دُور کریندے ہوئے ٻہوں سارے پاݨی دے ذخیرے وی بݨوائے۔ اوہ تعلیم دے پھیلار وِچ وی دلچسپی رکھدی ہَن تے کئی تعلیمی اداریاں کوں دل کھول کر عطیہ ݙیندی ہَن۔

رانی بھبانی دے دَور وِچ، انّھاں نے بھبانی پور مندر دی ترقی تے تزئین و آرائش کِیتے ٻہوں وݙا تعاون کِیتا۔ بھبانی پور ہِک شکتی پیٹھ ہِے جو بوگرہ ضلع دے شیرپور اپیزل وِچ واقع ہِے۔

ناٹور وِچ رانی بھبانی دا گھر اڄ تئیں محفوظ رکھیا ڳیا ہِے جو بنگلہ دیش وِچ سیاحاں دی توجہ دا مرکز بݨیا ہویا ہِے۔

شراکتاں

رانی بھبانی 'نٹور رانی' یا نٹور دی ملکہ دے ناں نال وی مشہور ہِن۔ انّھاں نے تاراپیٹھ تے بنارس وِچ وی زبردست شراکت کِیتی۔ تاراپیتھ، ہِک ہندو مندر دا قصبہ جو بھارتی صوبے مغربی بنگال وِچ واقع ہِے (تارا دیوی) تے ہندو سنت بامکھیپا کِیتے مشہور ہِے۔ وارانسی وِچ، درگا کنڈ مندر 18ویں صدی وِچ رانی بھبانی نے تعمیر کِیتا ہئی۔