رام چوترہ مندر

محل وقوع

اِیہ جاء سرائے سدھو کنوں شمال مشرق دے پاسے دریائے راوی دے پار واقع ہے اَتے اِین٘دے محاذ وِچ دریا دے اُوں پار لچھمن چوترہ مندر ہے اَتے اُوں جاء کنوں اَٹھ میل مشرق کوں سیتا کُنڈ واقع ہے۔ دریا سیتا کُنڈ کنوں رام چوترہ تئیں تِیر آلی کار سِدّھا وہن٘دا ہِے۔ ہزاراں ورھیاں کنوں اِیہ صورتِ حال چلدی آن٘دی ہے۔ اَتے دریا نے کݙان٘ہیں اِنّھاں ݙُون٘ہائیں جائیں دے وِچالے بے اعتدالی نِھیں کِیتی۔ اَڄ وی سیتا کُنڈ کنوں رام چوترہ نظردا ہے۔ بھان٘ویں جو انّھاں دے وِچالے اَٹھ میلاں دی وِتّھی ہِے۔

وجہ

آکھیا وین٘دے جو مہا راجہ رام چندر جی آپݨی ذال محترمہ راݨی سیتا اَتے پیارے بِھرا لچھمن دے نال سیر تے تفریح کِیتے تشریف گِھن آئے تاں انّھاں ساریاں نے سِیتا کُنڈ دی جاء اُتے ٹِکاݨاں کِیتا۔ وَل رام چندر اَتے لچھمن جی ݙُون٘ہائیں کپڑے لہا کے اشنان کِیتے دریا وِچ وَڑ ڳئے۔ اَتے دھان٘دے تَردے سِیتا جی کنوں اَٹھ میل پَرے چَلے آئے۔ پَر مہا راݨی سِیتا برابر انّھاں کوں ݙیہدی رہی۔ اَتے اِیہ وی پِچّھاں مُڑ کے راݨی کوں ݙیکھ گِھن٘دے ہَن۔ جہڑیلے اِیں جاء اُتے اَپڑے جہڑی ہُم اُنّھاں دے ناں نال مشہور ہے تاں مہا راجہ رام چندر دریا کنوں نِکّل کے ہِک اُچّی جاء اُتے عبادت وِچ مصروف تھی ڳئے اَتے لچھمن دریا دے اُوں پار انّھاں دے اصلوں سامھݨے ہِک چبوترے اُتے ٻَہہ کے پُوجا کرݨ لڳّے۔

اہمیّت

ہندؤواں دا اَکھاݨ ہِے جو پہلے دریا سِدّھا نہ وہن٘دا ہَئی۔ رام چندر جی مہا راج دے اشنان اَتے سِیتا جی دی بھال نال سِدّھا تِھی ڳِیا کُجھ آہدے ہِن جو جہڑیلے رام چندر ݙاہ میل مغرب کوں نِکل آئے اَتے انّھاں کوں سِیتا جی دا خیال آیا تاں اُنّھاں نے کھڑو کے سِیتا جی کوں ݙِٹّھا۔ انّھاں دے ݙیکھݨ نال سارے اَڑان٘داں ہَٹ ڳئے اَتے دریا تِیر آلی کار سِدّھا تھی ڳِیا۔ اِنّھاں تریہائیں جائیں اُتے مندر بݨے ہوئے ہِن اَتے وِچلے ݙاہ میل وِچ دریا دے ݙُون٘ہائیں پاسوں کَھڄّی، بڑ اَتے شیشم دے گھاٹے وَݨ ہِن۔ بساکھی دے موقع اُتے اِتّھاں ݙاڈھا چَنڳا میلہ لڳدا ہَئی، جین٘دے وِچ ہزاراں ہندو آ رلدے ہَن۔

ٻِیا ݙیکھو

• راجہ ہرناکشپ۔
• اسواپتی۔
• پرہلاد۔
• رام چندر جی۔