راقم چنڑ

اصل ناں       ملک عبدالرزاق

قلمی ناں       راقمؔ چنڑ

جٖمنْ           1967ء

تعلیم          میٹرک

پیشہ            زمیندارہ

فون نمبر        0345 8714699

جاہ پتہ         وستی رنگ پور ڈاکخانہ سمہ سٹہ ضلع بہاولپور

غزل

اساں تاریخ دے راقم نہ پچھ کیں حال بٖیٹھے ہیں

فقط کہیں دی حیاتی لو حیاتی گٖال بٖیٹھے ہیں

رُٹھے ہاکڑ ، وِکئے ستلج ، ساڈٖی تریہہ دا توں کیا پچھدیں

تسّے اجٖ وی اساں سندھو دے پاسے نال بٖیٹھے ہیں

ایڈٖوں سر تے نماشاں ہے ، اوڈٖوں گھر وچ بُکھے بٖال ان

نہ کر ہاسہ ، نہ بھن کاسہ ، نہ خالی ٹال بٖیٹھے ہیں

چھڑا لفظاں دی ار کھر وچ نسے ڈھالی کئی سوچ اپنْی

اساں ڈٖکھ دے سمندر کوں وی شعر اچ ڈھال بٖیٹھے ہیں

جڈٖاں ہے غم زمانے دے ڈٖتی گگھ رات مونجھاں دی

تیڈٖیاں یاداں دے ول راقمؔ اے ڈٖیوے بٖال بٖیٹھے ہیں