راج کُھرانہ نال ملاقات

نِرھان کرݨ کیتے سُبھاش جی راج پورا دے MLAسئیں راج پال کُھرانہ کوں وی سݙیا ہویا ہئی -اوہ وی نرھان کنوں پہلے ساݙے نال اَن مِلّے ۔ راج کھرانہ دا تعلّق جمال دین والی تحصیل صادق آباد ضلع رحیم یار خان نال ہے ۔ اوہ اَڄ وی اپݨے پتا دی دھرتی نال محبت رکھدن۔ اوہ آپ1955ء اِچ راج پورا (ہندوستان) اِچ ڄمّے ۔ وَل وی آپ کوں سرائیکی آہدن۔ انہاں دے والد سیاستدان نہ ہَن پر راج کُھرانہ سیاستدان ہِن۔ چوتھی واری صوبائی اسمبلی (چندی ڳڑھ) اِچ پہنتن۔ اَڄکل پنجاب دی چندی ڳڑھ اسمبلی وچ چیف پارلیمانی سیکرٹری فنانس اینڈ پلاننگ ڈیپارٹمنٹ ہِن۔ ایہ عہدہ وزارت دا ہے ۔ مستقل طورتے راج پورا وچ رہندن ۔ اوہ آپ سرائیکی ٻلیندے ریہے ۔ راج پورا بارے میں اُتّے کھول کے لکھ آیاں ۔ راج کُھرانہ کامرس گریجوایٹ ہِن۔ علاقے دے بھر پور کمّاں دی وجہ کنوں چوتھی واری اسمبلی ممبر بݨدے پئین ۔اوہ آپ محکمہ فنانس تے پلاننگ دے پارلیمانی سیکرٹری ہووݨ دے ناطے اپݨے علاقے کیتے فنڈ خوب مہیا کریندن تہوں لوک اُنہاں کوں وَلا وَلا اسمبلی اِچ پچا ݙیندن۔ راج کُھرانہ ٻہوں پیار نال ڳلکڑی پا کے سب کوں ملے۔ سئیں ظہور دھریجہ ‘ سئیں فرید پیرزادہ ‘ عابد سیال تے مجاہد بھٹی رَڄ کے تبادلہ خیال کیتا ۔ بیگم طاہر دھریجہ وی سبھاش دے ٹٻر نال گھل مِل ڳئی ۔ فوٹو چھکّے ڳئے۔ ساڈھے یارھاں وڄے تئیں سبھاش سئیں دے گھر کٹھ ریہا۔

ہُݨ اساں واپسی دا پروگرام بݨایا ۔ ڈاکٹر راج کمار ملک ساکوں اپݨے دفتر گِھن ونڄݨ دا پروگرام بݨایا ہویاہا ۔ فوٹو چھکیندیں میݙے کیمرے دی بیٹری تھک ڳئی ہئی تہوں میں راج کمار ملک کوں آکھیا جو بھون ڄلّو تاں جو میں ٻئی بیٹری چا گھناں۔ فرید پیرزادہ ‘ ظہور دھریجہ ‘ موہن بھگت تے میں راج کمار ملک نال بھون آئیوسے اَتے باقی سنگتیاں کوں سُبھاش جی اَپݨیاں گݙیاں تے بھون پُچوایا جتّھوں اوہ سیل کرݨ کیتے ݙو گروپاں وچ ونڈیج ڳئے۔

کیمرے دی بیٹری چا کے ساݙا گروپ ڈاکٹرراج کمار ملک نال اُنہاں دے دفتر آ ڳیا ۔اَڄ میں پہلے کرنسی تبدیل کراوݨ دا اِرادہ کیتا ہا ۔ تہوں فرید پیرزادہ تے میں کرنسی بدلواوݨ کرول باغ دے پوادھی پاسے کن ٹُر پیوسے ۔ کُئی ہک کلو میٹر دے پندھ پُڄ کے میں سو ڈالر دے ہندوستانی روپے گِھدّے ۔میکوں 4800/-روپے ہندوستانی مل ڳئے ۔ ساکوں بارڈر تے کرنسی پاکستانی سو ‘دے بدلے 56/-روپے ملی ہئی ۔ اَڄ ڈالر تبدیل کرائے تاں پاکستانی 83/-روپے دے ڈالر مطابق میکوں بھارتی کرنسی 57.38روپے ملی ۔ کرنسی تبدیل کرا کے آوݨ ویلے ساکوں چوک اُتّے ہک جلوس نظریا۔ اوہ بالکل اونویں جلوس ہئی جیویں ساݙے کن محرم تے تعزیاں دا ہوندے یا عید میلاد النبیؐ دا ہوندے ۔ فرق ایہو کجھ ہا جو ہندو آں دے جلوس وچ بُت ہَن تے ساݙے کن بندے تے اُٹھ ‘ گھوڑے ہوندن ۔ میں اُوں جلوس دے پھوٹو چھکّے ۔ وردی پوش جلوسئے ݙاڈھے سوہݨے پئے لڳدے ہَن۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان