راجہ داہر

رائے چچ دے بعد اُون٘دا نِکّا بِھرا رائے چندر تخت نشین تِھیا۔ اِیہ راجہ بُدھ مت دا پیرو ہَئی۔ اُون٘دے زمانے وِچ بُدھ ازم کوں وݙا فروغ تِھیا۔ ہر شہر وِچ اِیں تحریک نے نویں سِروں حیاتی پاتی۔ تبلیغ تے ارشاد کِیتے بُدھ پرچارک مقرر تھئے۔ آپ راجہ سارا ݙِین٘ہہ درویشاں اَتے فقیراں دی مجلس وِچ ٻہہ تے مذہبی ڳالھیں کرین٘دا رہن٘دا ہَئی۔ اَٹھ ورھیں ݙاڈھے جاہ تے جلال دے نال حکومت کرݨ دے بعد اِیہ نیک ناں راجہ دارِ فانی کنوں عالمِ باقی کوں ٹُر ڳِیا۔ رائے چچ دے بعد بھان٘ویں جو تخت دے ٻہوں سارے دعویدار اُٹّھی پئے، پر رائے چچ دا نِکّا پُتر داہر انّھاں ساریاں اُتے غالب آیا۔ اُوں نے پِیؤ دے تخت اُتے ٻہن٘دے ای مکران تئیں سارے قلمرو دا دورہ کِیتا۔ کُجھ مُد اُوں نے برہمن آباد وِچ لنگھائی۔ اُون٘دے بعد رور وِچ شاندار عمارتاں بݨوا تے اُوکوں گرمائی صدر مقام قرار ݙِتّا۔ اِیں طرح اُوں نے آپݨی حکومت دے ابتدائی اَٹھ ورھیں وݙے ٹھاٹھ نال لنگھائے۔

رائے رنمل دا حملہ

جہڑیلے راجہ داہر عروج تے اقبال دی انتہائی اُچائیاں تئیں اپڑ پِیا تاں ہندوستان دے رجیاں مہا راجیاں کوں اُون٘دی طاگت کنوں خوف تھی ڳیا۔ اُنّھاں نے متفقہ طور تے ہِک وݙا لشکر مرتب کر کے رائے رنمل دی اڳواݨی وِچ ٹوریا، جہڑا شب دروز یلغار کرین٘دا "رور" دیاں فصیلاں تئیں اپڑ پِیا۔ اُنّھاں ݙیہاڑیاں عرب سردار محمد علانی عبد الرحمن بن اشعث کوں قتل کر تے سندھ وِچ آ لُکیا ہَئی۔ تقریباً پنڄ سو سپاہیاں دا ہِک تَکڑا دستہ وی اُون٘دے نال ہَئی۔ بقولِ مرزا محمد ناظم برلاس راجہ آپ سوار تھی تے اُون٘دے کول ڳِیا۔ محمد علانی نے راجہ دا حون٘صلہ ودھایا۔ دشمن دے مقابلے وِچ لشکر کوں مرتب کرݨ دے مفید مشورے ݙِتّے۔ اَتے ہِک رات آپݨے پنڄ سو ٻیلیاں دے نال رائے رنمل اُتے اِیہجاں شب خون ماریا جو اُنّھاں ساریاں کوں کَپ تے رکھ ݙِتّا۔ راجہ کوں علانی دی اِیں بہادری نال ݙاڈی خُشی تھئی اَتے اُوں نے انّھاں دی وݙی قدر تے منزلت کِیتی۔ ۔ اُون٘دے بعد راجہ داہر کوں ہند دے راجاؤاں کنوں کُئی ݙُکھ نِھیں پُہنچیا۔ تقریباً پنڄیہ ورھیں اُوں نے وݙی شان تے شوکت نال حکومت کِیتی۔ اَخِیرلے دور وِچ اُون٘دے دماغ وِچ نخوت تے تکبّر نے گھر کر گِھدّا، جہڑا اُون٘دے ذوال دا سبب بݨیا اَتے اُون٘دے نال ای سرزمینِ سندھ کنوں ہندو سلطنت دا خاتمہ تھی ڳِیا۔

ٻِیا ݙیکھو

• چندر گپت موریا۔
• بکرما جیت۔
• رائے چچ۔
• راجہ ہرناکشپ۔

حوالے

۔