راجہ جے بادین

قدیم زمانے وِچ جے بادین ہِک ٻہوں وݙا راجہ گُزریا ہِے۔ اُوہ کشمیر دے شاہی ٹٻّر دی نسل وِچوں ہَئی، اَتے ذات دا برہمݨ ہَئی۔ آپݨی عمر دے اَخِیرلے حِصّے وِچ اُوکوں دُنیا کنوں کُجھ ایہجی نفرت تھی ڳئی جو ساری دولت تے حشمت چھوڑ کے جوڳی تھی ڳِیا۔ اُوہ آپݨے مذہبی عقیدیاں اَتے عملاں دا تَکڑائی نال پابند ہَئی۔ اِیں کِیتے ݙِین٘ہہ رات زیادہ تر پوجا پاٹ وِچ لنگھین٘دا ہَئی۔ کیوں جو اُون٘دے وِچ دینی اَتے دُنیاوی ݙُون٘ہائیں طاقتاں کَٹّھیاں تھی ڳئیاں اِیں کِیتے کئیں راجے کوں اُون٘دے اُتے حملہ کرݨ دی جُرات نہ تِھین٘دی ہَئی۔ جہڑیلے ہِک مُد تئیں ایں راجے دی سلطنت وِچ امن تے امان قائم رِیہا اَتے رعایا فارغ البالی نال ہمکنار ریہی تاں خُدا نے اُون٘دے خزانے وِچ برکت ݙِتّی اَتے اُون٘دے کول ایݙا مال کَٹّھا تھی ڳِیا جو ہندوستان دے کئیں ٻئے راجے مہا راجے کوں نصیب نہ ہَئی۔ جہڑیلے خزانہ ٻہوں وَدھ ڳِیا تاں راجے کوں اُون٘دی راکھی دی فِکر تھئی۔ اُوں نے شہر دے مشرق کَن ہِک حوض بݨوایا جین٘دا دَور سَو گز دا ہَئی۔ وَل اِیں حوض دے اندر ہِک سوہݨاں مندر اُسروایا جہڑا پنڄاہ گز دے دَور وِچ ہَئی۔ اِیں مندر وِچ اُوں نے ہِک کمرہ بݨوایا اَتے اُون٘دے وِچ سونے دی مٹّی دے چالھیہ مسی مٹکے رکھوا ݙتّے اَتے اُنّھاں کنوں انج ݙُو سو تِرِیہ مَݨ سونا رکھوا کے اُتّوں کنوں پٹوا ݙِتّا۔ اِیں خزانے اُتے ہِک مندر ہِے اَتے اُون٘دے وِچ ہِک مورت رکّھی ہِے۔ حوض دے چَودھار راجہ نے وَݨ لوا ݙِتّے، جہڑے اِیں ویلے تئیں بدستور قائم ہِن۔

اِیں مندر دا ناں ای سورج مندر ہَئی۔

ٻِیا ݙیکھو

• سورج مندر۔
• سورج دیوتا
• مول استھان۔