رات دا کھاݨاں سِکھّاں دے ہوٹل تے

ہُݨ ساکوں رات دا کھاݨاں کھاوݨاں ہا ۔ بھون دا مفت کھاݨاں کھاندے ساکوں ݙوجھا ݙینہ ہا ۔ کرول باغ اِچ پُچھدیں لبھدیں اساں ہک اہجیں ہوٹل تے پُڄ ڳیوسے جہڑا سِکھّاں دی ملکیّت ہا ۔ اساکوں اُتے ٻہݨ دی جاء مِلّی ۔ اساں چھی سنگتی ہاسے ۔ اِتھاں چݨیاں دی دال ‘ سبزی ‘ ساڳ نال اساں رات دا کھاݨاں کھادا ۔ کھاݨاں چنگے سواد آلا ہئی ۔ کم از کم بھون دے سادہ کھاݨے کنوں چنڳا ہا۔ کھاݨاں کھاوݨ دے بعد لنِگاں اِچ تھکیڑا لہہ آیا ہئی ۔ اَساں کھاݨے دے 180/-روپے اَدا کیتے (پاکستانی کرنسی اِچ320/-روپے بݨدے ہَن)۔ اساں بھون وِلّݨ کیتے سائیکل رکشے گھدوسے تے بھون پُڄ ڳیوسے۔ راشد مصطفیٰ آلا گروپ بھون پُڄ چُکا ہا ۔ اُنہاں دا حال چاتا ۔ نندر تے تھکیڑے کنوں چُور میں10:30وڄے سم پیئم ۔ اڳلے ݙینہ دا پروگرام میِر کارواں ظہور دھریجہ دے ذمے ہا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان