رائے چچ

سیلاج پنڈت دا چھوہَر چچ ممولی کلرک دی حیثیت نال راجے دی فوج وِچ بھرتی تِھیا۔ اَتے ترقی کرین٘دے کرین٘دے راجہ دا پرائیویٹ سیکرٹری بݨ ڳِیا۔ ۔ راجہ دی راݨی سوبھن دیوی این٘دے اُتے سو جان نال فِدا ہَئی۔ جہڑیلے راجے دا انتقال تِھیا تاں اُوں نے چچ کوں سندھ دے تخت اُتے ٻِلھا ݙِتّا۔ آنجہانی راجہ دے ہِک قریبی ساکدار راجہ مہرت نے این٘دے اُتے حملہ کِیتا۔ پَر رور دے نیڑے لڑدا ہوئیا ماریا ڳِیا۔ اُون٘دے بعد رائے چچ نے ملتان دا رُخ کِیتا۔ پہلے شہر بانبیہ کوں فتح کِیتا۔ اُون٘دے بعد اسکلندہ اُتے آپݨاں پرچم لہران٘دے ہوئے سکہ اپڑیا۔ ممولی جھڑپ دے بعد سکّہ دے حاکم نے شکست کھادی اَتے قلعہ چھوڑ کے بَھڄ ڳِیا۔ ملتان دا راجہ بجے راؤ زوراور لشکر گِھن تے نِکلیا۔ اُوں نے پوری شدّت نال چچ اُتے حملہ کِیتا، پَر اُوکوں شکست نہ ݙے سڳیا اَتے قلعہ بند تھی ٻیٹھا، اُوکوں کشمیر کنوں کمک مِلّݨ دی توقع ہَئی۔ جہڑیلے اُݙّوں کُئی مَدَت نہ مِلّی تاں اُوں نے چچ نال صُلح کر گِھدّی، اَتے آپݨے متعلقین سمیت قلعہ وِچوں نِکل ڳیا اَتے چچ فتح تے نصرت دے پھریر نال لہران٘دا ہوئیا ملتان وِچ وڑ آیا۔ رائے چچ نے مندر وِچ وَڑ تے دیوتاؤاں دے اَڳّوں سرِ اِرادت نِوایا نذرانے چڑھائے۔ ہِک ٹھاکر کوں شہر دا حاکم مقرر کِیتا اَتے اُون٘دے بعد کشمیر کَن قدم ودھائے۔ بجے راؤ دے مغلوب تِھیوݨ نال چچ دا اِیہجاں رعب ٻہہ ڳِیا ہَئی جو ہر پاسے دے حکام آپوں آپ مطیع تھی ڳئے۔ برہما پور، کروڑ اَتے اشہار دے حکمراناں نے وی سرِ اطاعت نِوا ݙِتّا۔ ہُݨ راجہ چچ کمبھ اَتے کشمیر کَن وَدّھیا اَتے اِنّھاں مُلکاں کوں فتح کرݨ دے بعد وَلدا رور وَل ڳِیا۔ چالہیہ ورھیاں حکومت کرݨ دے بعد 50 ہجری وِچ چچ نے انتقال کِیتا۔

ٻِیا ݙیکھو

• رائے چچ دا عروج۔
• بکرما جیت۔
• راجہ داہر۔
• راجہ ہرناکشپ۔

حوالے

۔