ذات کوں مِلی ذات

ہر طرف لوظ دے آپو آپݨے معنے ہوندِن ‘ کئی لوظ ایجھے ہوندن‘ جنہائیں دے اصلی معنے تاں ٻے ہوندن پر یاریں ‘ دوستیں اَتے سنگتیں ساتھیں دی کوئی ٹولی اوندے معنے اَپݨے مطلب موجب گھڑیے ہوئے ہوندن او جیرھے ویلھے آپت اِچ اَلیندِن ٻولیندن تاںاونکوں اپݨے ݙتل معنے لیکھے وَرتیندن ۔ مثال دے طور تے انگریزی ٻولی دا ہک لوظ اے ’’انجݨ‘‘ انجݨ اوں مشین کوں سݙیندن ۔ جیرھی اپݨے پُرزیں دی چلت پِھرت نال طاقت (پاور) پیدا کریندی اے ‘ ایہے انجݨ قسمہ قسم تے وَنکو وَنکی دے ہوندن۔ پر سبھنائیں کنوںمشہور انجݨ ریل دا اے ۔ جیرھا ریل گاݙی تے بھانویں مسافر گاݙی دے ݙٻے چھکیندے ۔ سرائیکی وسیب دے اَپݨے ہِیں تل اِچ نِکمے ‘نکارے ‘ پڈھی ‘ آلسی تے چندریں دے ’’سِرکوپ ‘‘ وَݙکے وَݙیرے یَا اِیئیں آکھ لیڈر کوں وی انجݨ آکھدِن ‘ کوئی بندہ اصلوں بھاڑ دا تَل ہووے ‘ تاں کِھل ٹوک تے مذاق دے طور تے یا خیر خواہی نال ہاں سڑدے ‘ کنوں اَکھیندن جو اوندا تاں ناں اِی نہ گھن ۔ او تاں چندریں دا انجݨ ہے۔

اے ڳالھ اساݙے ذہن اِچ ایئیں اَئی جو اساݙا یار مُنشی مُک مُکا ’’اُردو‘‘ دی ہک اخبار اِچ چھپی ہوئی ہک خبر ایہ ہئی کہ بلوچستان نیشنل موومنٹ دے اڳواݨ سئیں احتر مینگل ہوریں آکھیئے ‘ جیکر نواز شریف کوں سگنل مِل ڳیا تاں بی بی بینظیر اپݨی حکومت کائناں بچا سڳسے ۔ مُنشی مُک مُکا ‘ صوفی سرمچو کوں آکھیا جو بلوچ اڳواݨ سگنل مِلݨ آلی ڳالھ کر تے تُسیݙے’’ لیڈر‘‘ میاں نواز شریف کوں ہک لیکھے چندریں دا انجݨ ڳݨیے ۔ صوفی سُرمچو دا آکھݨ ہا جو ایہ سبھو اوندی (منشی دی) اپݨی …… اے اَتے او ایہا ڳالھ اوں آپوں گھڑی ٻیٹھے ۔ بھلا بلوچ لیڈر کوں کیا پتہ جو اِتھاں ۔ ایں پاسے ’’انجݨ‘‘ دا لوظ ایں طور اِی وَرتیندے ۔ وَل ایہ وی ہے جو بیان اِچ انجݨ دا لوظ ہک واری وی کتھاہیں نی آیا جو بیان لوک کریندے ہوئیں اولا رکھ ویندن ۔ چِٹ تے گھڑا نی بھنیندے ‘ ڳالھ کوں سمجھیا کر تے اینویں اڄائی نہ کوڑیج ڳیا کر کہ اُونویں ہک ڳالھ ہے جیجھے مونہہ تے جیجھے بُجے ‘جیجھے تساں ہیوے تے جیجھا تُسیݙا لیڈر اے ‘ ذات کوں مِلی ذات تے گامݨ مُول نہ رِیہا۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان