دیوان فرید

سرائیکی زبان دے مشہور صوفی شاعر خواجہ غلام فرید دیاں 272کافیاں تے مشتمل اے دیوان فرید ہے ۔ خان پور توں ایں کتاب دی 1100عدد کاپیاں چھپی ہئی ۔ ناشر منیر دھریجہ تے ظہور دھریجہ نے اُردو زبان اِچ عرض حال دے عنوان ہیٹھ ایں دیوان دی وجہ اشاعت بیان کیتی ہے ۔ ایں دیوان فرید دی بنیاد سردار پیر بخش خان کورائی موضع ڈیرہ گبولاں تحصیل خان پور ضلع رحیم یارخان دے معتبر تے قلمی نسخے تے ہے ۔ جیڑھے اپݨے وقت دے عالم و فاضل شخصیت تے خواجہ فرید دے دست بیعت مرید ہن ۔ دیوان دی خاص ڳالھ کافیاں دے آخر وچ مذکور او موضوع وار فہرستاں ہن جیڑھیاں کلام فرید اِچ مذکور رجال و مقامات ، نباتات و جمالیات ، پارچہ جات و ملبوسات ، ظروف و زیورات ، اوزار و آلات ، برسات تے ایندے متعلقات ، معدنیات ، سمیات ، خوشبویات، حیوانات ، پَھل ، پُھل ت مزامیر کوں بیان کریندن ۔ ایں توں علاوہ کلام فرید دے مترجمین دی فہرست وی موجود ہے بھاویں انہاں کلام فرید دا پورا ترجمہ کیتے ، بھانویں جزوی ترجمہ کیتے ۔

کتاب دے بیک پیپر تے ظہور دھریجہ تے منیر دھریجہ لکھدن:

’’ادارہ جھوک سرائیکی زبان دی ترقی تے ترویج کیتے ہک عرصے توں کم کریندا پے ۔ ایں ادارے دے زیر اہتمام شائع تھیوݨ والا کلھا سرائیکی ݙینھ وار اخبار ’’جھوک‘‘ بے سروسامانی دے باوجود سرائیکی دے دشمنیں نال چومُکھی جنگ لڑدا پے ، توݨیں جو غیریں توں زیادہ ’’اپݨیں‘‘ جھوک کوں مار مکاوݨ دا پورا ترلا کیتے پر خدا دا شکر اے جو ادارہ جھوک اپݨا ’’جہاد‘‘ جاری رکھی پے، تے اپݨے اصل مشن توں ہک پَل کیتے وی غافل نی تھیا۔

سرائیکی اِملاء تے ݙوجھیاں غلطیاں توں پاک ’’دیوان فرید‘‘ دی اشاعت جھوک کیتے ہک اعزاز اے ، اڳلے ایڈیشن کوں سوہݨا بݨاوݨ کیتے رہبری کریسو۔

وسیبی بھراوو!

چھیکڑ اِچ درد مندانہ ارداس کریندوں جو سرائیکی زبان دی اڳونہی کیتے ادارہ جھوک دے ٻانھ ٻیلی تھوو ، ہک مُٹھ تھی تے اسیݙے مونڈھے نال مُونڈھا رَلائو تاں جو اساں تھک نہ ونڄوں تے ’’منزل‘‘ تے پُڄݨ دا پندھ کھوٹا نہ تھیوے۔‘‘

حوالہ

ظہور احمد دھریجہ دی سرائیکی ادبی خدمات دا جائزہ (مقالہ نگار: شائستہ ظہور،بہاء الدین زکریا یونیورسٹی ملتان)  نگران مقالہ: ڈاکٹر محمد ممتاز خان کلیانی