دیوانِ فرید وچ نوں،کوں،تیرا،تیݙا
ایہ تعصب ہی ہے جہیں کلام فرید وچ استعمال تھئے ڳئے لوئاں دی شکل کوں بگاڑ ݙتے۔ جے کتھائیں "نوں" لکھا ڳیا ہووے تاں اونکوں "کوں" نال بدل ݙتا ڳئے تے جے کتھائیں "تیݙا" لکھا ڳیا ہووے تاں بعض لوکاں دی طرفوں اینکوں "ٹینڈا" بݨا ݙتا ڳئے۔ یا کتھائیں اینکوں بلا وجہ "تیرا" کر ݙتا ڳئے۔ انہاں نکے نکے کماں نال کوئی وݙی تبدیلی تاں کائنی آ سڳدی۔۔۔۔ہا ، نفرتاں ضرور پیدا تھی سڳدیاں ہن۔ جیہڑا طبقہ کلامِ فرید کوں غیر ضروری طور تے "سرائیکیانے" دے حق وچ ہے تے لفظ "نوں" وغیرہ سݨ تے کن تے رَتے کر گھندے ہِن، اساں انہاں توں وی ارداس کریندے ہیں جو اوہ سرائیکی زبان دے لسانی جغرافیے تے نظر مارن۔ انہاں کوں لفظ "نوں" ملتان توں باہر نکلدے ای جھنگ توں تھیندے ہوئے ڈیرہ اسماعیل خان دیاں حدود تک استعمال تھیندا ہوا ملسی۔ تاں ولا کیا جھنگ، پاکپتن، میلسی، ساہیوال، ٹوبہ ٹیک سنگھ، خوشاب، چنیوٹ، میانوالی، بکھر وغیرہ دی زبان کوں پنجابی تسلیم کر گھنوں؟۔۔۔ کیا ایہ متعصب سرائیکی حضرات صرف لفظ "نوں" دی وجہ نال انہاں علاقیاں دی زبان تے زمین توں دستبردار تھیوݨ کوں تیار تھیسن؟ تے جیہڑے لوک غیر ضروری طور تے خواجہ فرید کوں "پنجابیانے" دے حق وچ ہن، او "کوں" کوں "نوں" نال بدل ݙیندن۔ پنجاب کیتے "اسٹریٹیجک ڈیپتھ" دی ڳول پھرول وچ دلی، پشاور، کابل، کشمیر، کشمور، بدین، ٹانک، بنوں تے چاغی تک دندھاݨے دے خواب ݙیکھݨ حماقت دے علاوہ کیا تھی سڳدا ہے؟ پاکپتن دے بابا فرید الدین مسعود شکر گنج تے چشریف دے بابا بلھے شاہ تے راوی دے شاہ حسین دے کلام کوں "پنجابیانے" دے بعد خواجہ فرید دے کلام تے ہتھ صاف کرݨ دا خواب کݙاہیں شرمندہ تعبیر نی تھی سڳدا۔ ہا ایہ ضرور تھی سڳدا ہے جو نقشے تے کجھ نویاں لکیراں ابھر آوݨ۔
ایہ بحث لسانی توں جغرافیائی تے سیاسی نہیں بݨݨی چاہیدی، ایں سانگے اساں ایں فقرے تے اکتفا کریندے ہیں جو سرائیکی تے پنجابی ݙوہاں زباناں دے متعصب حضرات کلام فرید دے نال کھیݙ نہ کرن۔
اساں ایں ڳالھ دے وی قائل ہیں جو ایہ تمام علمی نسخہ جات کہیں ہک ابتدائی نسخے دی نقل در نقل ہن، جیہڑا حضرت خواجہ غلام فرید دے ہتھوں دا لکھیا ہوا کائنا ہا۔ اگر ایں بنیادی نسخے وچ کہیں "کوں" کوں "نوں" لکھ ݙتا ہوسی تاں او اڳوں چل تے ایں شکل وچ رائج تھی ڳیا ہوسی تاں ول آخر ایں ڳالھ دا کیا جواز ہے جو درجناں مقامات تے "نوں" کوں "کوں" نال تبدیل کر ݙتا ونڄے تے ایں توں وی زیادہ مقامات تے اینکوں "نوں" ہی رہوݨ ݙتا ونڄے۔