دین پور شریف
دین پور شریف دا ذکر ݙاڈھا تھیندا ہئی ۔ نانا سئیں اُتھائیں دے مرید ہَن۔ خانپور دے نیڑے اچ دین پور شریف دی وستی علم و عرفان، تصوف تے روحانیت تے اسلامی تحریکاں دے مرکز دی حیثیت نال سابق ریاست بہاولپور اچ نمایاں مقام دی حامل رہی ہے۔ تقریباً ہک صدی پہلے موجود دین پور دی جاہ گھاٹا جنگل ہا، خلیفہ غلام محمد ؒ اپݨے مرشد حضرت سلطان العارفینؒ توں خرقہ خلافت حاصل کرݨ دے بعد ایں جاہ سکونت اختیار کیتی تے تھوڑے ای عرصے اچ ایہ ویران جاہ ہک آباد وستی دی شکل اختیار کر ڳئی، ایں وستی اچ خلیفہ صاحب ہک مسیت بݨوائی ، جیں اِچ ہر ویلھے فقراء دی جماعت ذکر واذکار اچ مشغول راہندی ہئی۔حضرت صاحب دی وفات دے بعد رشد و ہدایت دا سلسلہ آپ دے فرزند ارجمند مولانا عبدالہادی ؒ جاری رکھیا ۔ دین پور شریف تحریک ریشمی رومال ، تحریک خلاف تے تحریک ختم نبوت دا اہم مرکز ہا۔ ہندوستان بھر دے علمائے کرام دین پور اچ آوݨ اپݨی سعادت سمجھدے ہن۔، حضرت مولانا عبیدا للہ سندھی ، مولانا تاج محمد، حضرت خلیفہ غلام محمد، حضرت مولانا عبدالہادی تے ٻئے اکابرین دے مزارات اتھائیں انتہائی سادہ مقبریاں اچ ہن۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان