دھریجہ نگر دے کھوہ
دھریجہ نگرءِچ کھوئیاں وی ہن پر وستی دے پنج کھوہ ہن ، ہک کھوہ اساݙے گھر دے نال ہا ، ٻیا کھوہ وݙی مسیت دے نال ہا ،تریجھا کھوہ حاجی اللہ بچایا دے ویہڑے دے ٻاہروں ہا، چوتھا کھوہ جام ڄیند دی وستی دے نال تے پنجواں کھوہ سڑک تے کلابے نال ہا ، اے کھوہ بھوئیں دے پیچ پلاوݨ دے کم اَمد ے ہن، پیوݨ دا پاݨی وی اتھائوں بھریندا ہا ، ڈھور ڈھانڈا وی اتھائوں پاݨی پیندا ہا ، عورتاں کپڑے وی اتھائیں دھوندیاں ہن تے وستی دے بندے دھمدے وی اتھائیں ہن ، ہر کھوہ دے پکے کھاݙے بنڑیے ہوئے ہن ،کھوہ کوں ݙاند وہیندے ہن پر زمین دے کیارے پیچ ونڄن ہا تاں ݙاند ودھا گھندے ہن ،ولا ݙو بندے رل تے کھوہ ڳڑیندے ہن ، آکھدن جو پہلے کھوہ دیاں لوٹیاں مٹی دیاں ہوندیاں ہن ، اساں لوہے دیاں لوٹیاں ݙٹھیاں ہن ، ہک پروبھرا کھوہ دھریجہ پھاٹک آلے پاسے تھی ویندا ہا تے دھریجہ پھاٹک آلیاں زمیناں اُوں کھوہ نال سیراب تھیندیاں ہن ۔ ہک ڳال یاد آئی اے کھوہ تے زنانیاں کپڑے دھوندیاں ہن ،کھوہ تے وݙے واقعے تھیندے ہن ہک واقعہ اے تھیا جو کاں صابن چا ڳیا سس نونہہ کوں بُجا ݙتا اندھی تھی ٻیٹھی ہاویں ،کاں صابن کتھائیں سٹ تے ولا آن ٻیٹھا ،جہڑی مائی سس کنوں بُجا کھادی ٻیٹھی ہئی ، کاں کوں بُجا ݙے تے آکھیس ،دھوبی دا پُتر آ، ماء دی سُتھݨ دھو اَئیں ، نہ صابن چاویں ہا تے نہ میکوں بُجا کھواویں ہا ۔ نال ٻیٹھی سنگتاݨی آکھیا جو کاں حرامی کپڑے کائناں دھووݨیں ہن ، صرف سس نونہہ دا پھیٹا پواوݨا ہا ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان