دھریجہ نگر دا بھوپا
اسیݙی وستی دھریجہ نگر دا اللہ بخش دھریجہ ݙوہڑے کافیاں پڑھدا ہا ، ہر شادی تے جھمر وی سوہݨی کھیݙدا ہا ، اوندی مشہوری ہک بھوپے دی ہئی ۔اپݨی وستی ءِچ کرتب کائنا کریندا ہا باقی کُئی رات خالی کائنا ہئی ،کݙاہیں کُئی سݙ ویندا ہا کݙاہیں کُئی ۔ اوندی وݙی مشہوری اے ہئی جوپھوپا جِنیں کوں انڳلیں تے نچویندے ،کرڑے جن کوں مار مار تے سُؤر بݨا ݙیندے تے جادو ٹوݨے دا وی تروڑ کریندے تے پُراݨے توں پُراݨے تعویذ وی کڈھ گھندے ۔اساں اپݨی ہٹی تے عورتیں آلی نسوار وِچیندے ہاسے ۔ماما اللہ بخش بھوپا اَکھیندا ہا جو خالی نسوار آلا ڈٻا میکوں ݙتا کرو۔میکوں سمجھ نہ اَمدی ہئی جو کیا کریندا ہوسے،ہک واری بندہ آیا تے آکھیس بھوپے کوں سݙ ݙیو، میں سݙݨ ڳیُم تاں ماما اللہ بخش تعویذ لکھ تے ڈٻے دے اندروں ملیندا ٻیٹھا ہا ،میں آکھیا ماما اے کیا ؟کِھل پیا تے آکھیُس جو رات ایہو تعویذ دوست علی شاہ دے غستان ءِچوں برآمد تھیسے ۔میں آکھیا جو ڈٻے نال تعویذگساوݨ دا کیا فائدہ ؟اوں آکھیا جورات میں بھوپا بݨ تے جن کھیݙساں تے مارکیں کوں آکھساں جو فلاݨی جاہ تے پراݨا تعویذ پوریا پے جئیں ایلے او چیسن تاں من ویسن جو اے تعویذ ڈھیر مُد پہلے دا لکھیا ہویا ہے ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان