دِلّی وچ آخری ݙیہاڑا
27؍اگست خمیس وار
[لکھو | ماخذ وچ تبدیلی کرو]اَج ساڈا دِلّی وچ آخری ݙیہاڑا ہئی ۔اونویں تاں ویزا29؍اگست تئیں ہا پر اساں 28اگست دے دوستی بس دے ٹکٹ گھن چُکے ہاسے جیندی وجہ میں اُتّے لکھ آئیاں۔ اساں ہندوستانی بس دے ارام پچھوں ہک ݙینہ ضایا کیتا ۔ اَڄ دا ݙینہ اساں خریداری کیتے مقرر کیتا ۔میں رات کوں راشد مصطفیٰ خاں نال ایہ مِتھّی ہئی جو کل اساں ݙونہیں کٹھیّ ڄلسوں۔ کیوں جو راشد مصطفیٰ خریداری کر چُکے ہَن تہوں اوہ میݙے نال ونڄݨ کیتے راضی تھی ڳئے ۔ راشد مصطفیٰ ہک سیاݨاں نوجوان ہے ۔بزاراں دے بھاء ‘ دکانداراں دیاں چالاکیاں‘ اَتے چنگی مندی شے کوں سمجھدے۔ اُنہاں میݙے نال ڄلݨ دی حامی بھر گھدی۔
اَج خمیس وار ہا ۔ کل اساں اجمیر توں وَلّے ہاسے تاں مینہ ساݙے اڳوّںاڳوّں ریہا ہا تے اساں پچھّوں پچھّوں گݙی تے آندے ریہے ہاسے ۔ دِلّی پچیوسے تاں پتہ لڳا جو چنڳی بھلی بارش تھی چُکی ہے۔موسم ٹھڈا ہئی ‘ گݙی وچ وی سفر کرݨ دا مزا سوایا تھی ڳیا ہا ۔اساں اَڄ دیر تئیں سُتے ریہوسے ۔ نرھان بھون وچ سمان منگا کے کر گھدّا ۔ 10:30وڄے ٻاہر نکلیوسے ۔ حالی اَدھ کلو میٹر تے جینز مارکیٹ تئیں سفر کیتا ہا جو مینہ وسّݨ لڳ ڳیا ۔ بزار وچ ہک سکھ دی دکان تے اَڑ ڳیوسے۔ اُونیں محبت نال جاء ݙتی۔ اوہ ہُݨ سارے ݙینہ وچ مندے دا خیال کرکے فکر مند ہا۔ مینہ مُکاّ اساں پچھاّں بھون کن ٹُر پیوسے ۔ مینہ چنڳاں وسیّا ہا ۔ ہر پاسوں نالے وہندے پئے ہَن ۔ چھپّر ‘ ترپالاں ‘ چھڄیّ تے بالکونیاں وہندیاں کھڑیاں ہن اَساں کجھ قدم چاتے ‘ مینہ وَلا گھڑے ٻوڑ وَسیّا ۔ ݙاڈھے اوکھے بھون تئیں آئیوسے ۔ بھون دے اڳوں پاݨی ہا ۔ اَساں جُتیاں لہائیاں ‘ ننگے پیر اندر ڳیوسے۔ اندر وَن کے پیر دھوتے تے سڑک اُتوں مینہ دا پاݨی لہݨ دا انتظار کیتا ۔ہُݨ مینہ رُک ڳیا ہا ۔
تھولی دیر اِچ ہَسیجا صاحب اپݨی گݙی گھن کے آ ڳئے ۔ اَڄ دا ڈیلیگیٹ ݙو حصیاں اِچ ونڈیج ڳیا ہا ۔ راشد خان تے میں شاپنگ کیتے چلے ڳئے باقی سب پاکستانی ہائی کمیشن دے پریس سیکرٹری عابد سعید کوں مِلݨ چلے ڳئے ۔ اَساں 24؍اگست کوں پاکستانی ہائی کمیشن نال رابطہ کیتا ہا ۔ کئیں ویلے آہدے ہَن کِتّی بندے ہوسو؟ کئیں ویلے آہدے ہَن ݙہ وڄے آئو ‘ کئیں ویلے آہدے ہَن ݙو وڄے آئو ۔ وَل آکھیونیں اساں آپ ݙسیسوں ۔ برحال اَڄ ٻارھاں وڄے دا ٹائم ہائی کمیشن دی طرفوں مِل ڳیا ۔ میں تاں ونڄݨ توں انکار کر ݙتا باقی اَٹھ سنگتی ظہور دھریجہ دی اڳواݨی وچ چلے ڳئے ۔ ہائی کمیشن دی طرفوں سواگت دا حال بعد اِچ کریسوں پہلے شاپنگ دا حال۔
حوالہ
[لکھو | ماخذ وچ تبدیلی کرو]کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان