دِلّی ونڄݨ دی خُشی اَتے ہک تشویش

ہُݨ ساکوں پک تھی ڳیا ہا جو دِلّی داسفر نیڑے آ ڳئے ۔ سویلے سَت وڄے بس ٹُرنی ہئی ۔ ساکوں پنج وڄے گلبرگ IIIوچ دوستی بس ٹرمینل تے پُڄݨاں ہا  جیندی خاطر رات ترے وڄے جاگݨ ضروری ہا۔ چار وڄے تیار تھی کے سواری پکڑنی ہئی تاں جو پنج وڄے گلبرگ پُڄ سڳوں ۔ پر ایں پہلی رات ساݙی نندر اُݙ ڳئی ۔ تھیا ایں جو لہور دے ڈائیوو ٹرمینل تے ساکوںفرید پیرزادہ دے آوݨ دی اُمیند ہئی۔ ملتان توں لہور تئیں ساݙا اُنہاں نال اَتے اُنہاں دا ڈاکٹر راج کمار ملک تے ڈاکٹر جے۔ سی۔ بترا نال رابطہ ریہا ہا ۔ جِہڑیلے اساں لہور دے نیڑے ہاسے تاں اُنہاں ظہور دھریجہ کوں آکھیا جو میݙے کول گݙی کوئینیں تہوں میں تہاکوں لہور ڈائیوو ٹرمینل تے نہ مِل سڳساں ۔ تہوں اَساں اُنہاں دے ڈائیوو ٹرمینل تے آوݨ دی کُئی خاص پرواہ نہ کیتی۔ اوہ شام تئیں ساکوں نہ ملّے ۔ نہ صفّاں آلے چوک آئے نہ پارک وے ہوٹل ‘ نہ رابطہ کیتونیں ۔ اُنہاں دا موبائل بند مِلدا ریہا۔ رات کوں دیر نال موبائل مِلیّا تاں اکھیوسے جو ساݙے اَٹھ اصل شناختی کارڈ تہاݙے کول ہِن چاتی اواہے ۔اکھیونیں میݙے کول شناختی کارڈ کوئنیں ۔ اصل وچ اوہ اَٹھ شناختی کارڈ گم تھی چُکے ہَن ۔ ویزا لواوݨ ویلے سئیں فرید پیرزادہ آپ ساݙے شناختی کارڈ گھن ڳئے ہن ۔ شناختی کارڈ گم تھیوݨ دا سُݨ کے سب دے مونہ لٹک ڳئے۔ ظہور دھریجہ ڈیلیگیٹ دے اڳواݨ ہووݨ پاروں انج پریشان ہَن ۔ کجھ دیر بعد ساکوں مِلّݨ کیتے ڈاکٹر نوید شہزاد آ ڳئے ۔ ڈاکٹر صیب پنجاب یونیورسٹی اورینٹل کالج دے پنجابی شعبہ وچ پروفیسر ہِن ۔ پنجابی دے مہان شاعر ‘ چنڳے محقق تے اعلیٰ نثر نگار ہن ۔ اُنہاں ساکوں پریشان ݙیکھ کے حال پُچھیا تاں اوہ وی انج پریشان تھئے۔ تھولی دیر بعد سئیں ارشاد امین تے صفدر بلوچ ساکوں مِلّݨ کیتے ہوٹل وچ آ ڳئے ۔ اُنہاں شناختی کارڈ گم تھیوݨ اُتّے ساکوں پرچایا تے مُکاݨ ݙتّی۔ صفدر بلوچ لہور وچ ملازمت کریندن ۔ اوہ وزارت اطلاعات و نشریات دے ادبی ادارہ’’ماہ نو‘’ دی مجلس ادارت اِچ شامل ہِن۔ سرائیکی زبان و ادب دی تحریک دے اڳواݨ تے کارکن ہِن ۔ اُنہاں دا تعلق بکھّر نال ہے ۔ لہور وچ اَپݨاں ہک خاص حلقہ رکھیندن ۔ سئیں ارشاد امین دا تعلق چاچڑاں شریف نال ہے۔ پُراݨے سرائیکسٹ ہِن۔ کئیں زمانے ملتان توں ݙینہ وار اخبار’’سُڄاک‘‘ کڈھیندے ریہ ڳئین ۔ کئی سرائیکی علمی ‘ ادبی‘ سیاسی تے ثقافتی تنظیماں دے کرتا دھرتا اڳواݨ تے موہری ہِن۔ لہور وچ ادبی تقریباں کریندے رہندن۔ لہور وچ سب توں لمبے قد آلے نظردِن ۔ ایہ ٻئی ڳالھ ہے جو جِھک نوائی اُنہاں دی خاص اَدا ہے ۔ اُچے ضرور ہِن پر نظر جِھکّے آندن ۔ یاراں دے یار ‘ سنگتیاں دے سنگتی ‘تے ہر مجلس دی آن ہِن۔ظہور دھریجہ آہدے ہَن جو اصل شناختی کارڈ فرید پیرزادہ کول ہِن اَتّے فرید پیرزادہ آہدے ہَن جو ایہ کارڈ ظہور دھریجہ کول ہِن ۔ اساں باقی سارے سنگتی ٻوّے تھئے کھڑے ہاسے ۔ برحال اِتھاں مانواں دھیاں وچ گُم ہا۔ پتہ نہ پیا لڳدا ہا جو ذمے وار کون ہے۔

برحال رات کوں ایں پریشانی وچ وی کئیں روٹی مانی نہ منگی‘ صرف وَل وَل پاݨی منگیا۔ اَخیر ایں تشویش وچ رات دے یارھاں وڄ ڳئے اَتے سب شناختی کارڈاں کوں روندیں پٹدیں سم ڳے ۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان