دِلّی دی سیل

ٹکٹاں بک کرا کے ولا میٹرو ٹیشن تے پُڄے اَتے راجیو چوک کنوں انڈین سیکرٹریٹ دے ٹکٹ گھن کے انڈین سیکرٹریٹ ان لتھوسے ۔ ہُݨ اساں  پیریں سفر کیتا ۔ انڈین سیکرٹریٹ دیاں لمبیاں موکلیاں عمارتاں ݙٹھیاں ۔ قومی اسمبلی سیکرٹریٹ وی نال ہا ۔پریذیڈنٹ ہائوس وی اِتھائیں نال ہے ۔ دِلّی دے مرکزی دفتر ٻہوں شاندار علاقے اِچ انگریزی دور دیاں یادگاراں ہِن ۔ ارباں روپیاں دیاں ایہ تعمیرات جہڑیاں ہندوستان کوں انگریز ݙے ڳے اُنہاں دے خزانے دا ٻہوں وݙا خرچہ بچا ڳیاں ۔ پاکستان کوں کراچی ہووے بھانویں اسلام آباد‘ مرکز نویں سروں بݨاوݨاں پیا ہا ۔ کراچی وچ تاں صوبائی سیکرٹریٹ ہا پیا پر ساݙا اسلام آباد تاں ارباں کھرباںدے ساݙے اپݨے خرچے نال بݨیا کھڑے‘ ہندوستان کوں کم سے کم خرچہ تاں بچے البتہ عمارتاں وچ نویں وادھے نظردے پئے ہِن ۔ شہر دا ایہ حصہّ ٻہوں صاف ستھرا ہے ۔ پلاٹ بندی خوب ہے ۔ سڑکاں چمکدیاں پئین ۔ سڑکاں اُتّے خامخاہ کُئی سکیورٹی نہ ہئی  نہ بیرئیر ہَن کتھائیں‘نہ اوہ خاص رکاوٹاں ہَن جہڑیاں اسلام آباد وچ عام نظردِن۔ اساں دِلّی دا ایہ مرکزی علاقہ پیریں ٹُردیں ݙٹھّا۔ ہُݨ اساں واپسی دی تیاری کیتی اَتے درگاہ حضرت خواجہ نظام الدین کیتے رکشہ کیتا ۔ رکشہ انڈیا گیٹ تے رُکیا ۔ اَساں پھوٹو بݨائے ۔ اِتھاں ٹریفک دا ٻہوں رش ہا ۔ ساݙے رکشے آلا ہندو ہا اونیں ساکوں  درگاہ حضرت نظام الدینؒ لہایا۔عابد سیال جہڑے ویلے کرایہ ݙیوݨ کیتے رقم کڈھی تاں رکشے آلے آکھیا جو پیسے لُکا کے رکھو اِتھاں ڳنڈھ کپ ودِن۔

درگاہ حضرت نظام الدینؒ دے ٻاہروں مرزا غالب دی قبر ہے ۔ ہک وݙا احاطہ ہے جیندے وچ غالب کلھّا پئے تھیا ۔ جیویں حیاتی وچ آپ کوں کلھّا سمجھدا ہا اونویں مرݨ دے بعد وی کلھّا ہے ۔ غالب دے مزار کنوں پہلے غالب اکیڈمی دی ترے منزلہ عمارت ہے تلّے دفتر وچ اکیڈمی دے سیکرٹری ڈاکٹر عقیل نال ملاقات تھئی ۔ ݙاڈھی محبت نال ملے صرف پھوکا پاݨی اِی پلا سڳے جتھوں اکیڈمی دی مالی حالت دا پتہ لڳدا ہا ۔ غالب اکیڈمی وچ ہک وݙی لائبریری تے غالب میوزیم ہے ۔ میوزیم اساں کھلوا کے ݙٹھا ۔ غالب دے نواردات ݙٹھے ۔ ہک پاسے شیشے وچ مرزا غالب ٻیٹھا ہا ۔ اوندے نال ٻہہ کے اوندا حال گھدّا ۔ پھوٹو چھکوائے ۔ غالب دے خط ‘ اوندے ویس ‘ تصویراں ‘ غالب دے زمانے دیاں شئیں ‘ سبھّو کجھ غالب دے دور کوں جیندا جاڳدا رکھی پئے ۔ بر حال چنگیاں کوششاں ہِن۔ لائبریری وچ وی ہزاراں کتاباں ہِن کجھ کتاباں وِکائو وی ہَن ۔ میں بار چاوݨ کنوں گُسویندیاں ہوئیاں کتاباں مُل نہ گھدّیاں ۔ اَپݨی ہک کتاب ’’سرائیکی زبان وچ کنایہ تے قرینہ ‘‘ لائبریری کوں دان کیتی ۔ آپݨیاں کتاباں دی فہرست ݙتی ۔ کجھ دیر غالب اکیڈمی وِچ ٻہہ کے اساں مزار حضرت نظام الدینؒ اُتے حاضری ݙیوݨ کیتے ٹُر پیوسے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان