دِلّی دا ہول
دِلی جیویں جیویں نیڑے آندا ویندا ہا میݙا ہول وَدھدا ویندا ہا ۔ کیوں جو میں پڑھیا ہویا ہا جو :
1: دِلّی شہر نموناں اندر مٹّی ٻاہر چُوناں
2: دِلّی ٹھڳ تے کُوڑا جیسلیمر
3: دِلّی تے پھیکری ‘ جیہیں ماء تے جیہیں ڈیکری
4: کاکا دِلّی وال ‘ تھولیاں ڳالھیں ڈھیر دَھتال
5: ٹھڳ دِلّی دے ‘ پِیراجمیر دے ‘ تھاں مراد آباد دے ‘ کُوڑ جیسلمیر دے
ایہ ڳالھ تاں مُکّی مُکائی تے منی منائی ہئی جو دِلّی وچ ٹھڳاں نال وی واسطہ پوسی ۔ کیوں جوآکھیا ویندے جو بنارس دے ٹھڳ وی دِلّی آ ڳئین اَتے اِتھّوں دے ٹھڳاں بنارس آلیاں نال پُتراں دے ساکھ رکھ گھدّن۔
دِلّی توں تقریباً50ک ۔م پہلے اساں ہک سکندری اوور ہیڈ پُل پار کیتا جہڑا کئی کلو میٹر لمبا ہا ۔ تلوں کئی سڑکاں لنگھدیاں پیاں ہَن ۔ سڄے کھٻے کمرشل مارکیٹاں تے پلازے ہَن ۔ میں ایں شہر دا ناں نہ پڑھ سڳیم۔ واپسی تے اساں ایں روٹ توں اِی نہ لنگھے تاں اِی پتہ نہ لڳ سڳیا۔ ایہ پُل واہگہ کنوں دِلّی تئیں دے ساریاں پُلاّں تے اوور ہیڈبرجاں وچ سب توں وݙا تے شاندار ہئی ۔ ایندے اُتّے کم حالی وی جاری ہا ۔ بر حال اَساں کئی چھوٹے وݙے شہر ٹپدے ۔ ٹھٹھیاں وستیاں وِچوں لنگھدے ‘ بس سٹاپ تے اݙے لتڑیندے‘6:40 شام کوں دِلّی وچ DTCدے اݙے تے لتھّے کھڑے ہاسے۔
اساں رات ترے وڄے جاڳے ‘ چار وڄے TDCPکن ٹُرے۔ پنج وڄے گلبرگ لہور پُڄے۔ ست وڄے لہور توں نِکلے ۔9:15تے واہگہ کوں چھوڑ کے 9:25گھنٹے دا سفر کرکے دِلّی پُڄ ڳیوسے۔ پندرھاں گھنٹے ایں بے آرامی اِچ گزارے ہاسے۔ تھک تُرٹ کے چُور چُور تھئے پئے ہاسے ۔ بس توں لہہ کے ٹُرݨ دی ہمت نہ ہئی ۔ پر جیویں ساݙی دید ٻاہر گیٹ تے پئی سئیں ڈاکٹر راج کمار ملک تے ڈاکٹر جے ۔سی۔ بترا ہوریں ہتھاں دیاں اشاریاں نال ساݙا سواگت کیتا ۔ سارا تھکیڑا لہہ ڳیا ۔ ہاں دیاں پپّوں ٹھر ڳیاں۔ اَکھیں کوں ٹھاڈل مِل ڳئی ۔ دِل کوں سکون آ ڳیا ۔ گیٹ دے ٻاہر آئیوسے بھاکل پاپا سب کوں ملیوسے ۔ ساریاں یاتریاں کوں جعفری پُھلّاں دے گجرے پوائے ڳئے ۔ فوٹو چھکیّ ڳئے ۔ ڈاکٹر بترا سئیں ‘ ایج کیئر دی طرفوں سب کوں پی کیپ پوائیاں ۔ ایں کم اِچ ادّھا گھنٹہ لڳ ڳیا ۔ لوک ساکوں ݙیکھݨ آلے ہووِن جو اے کون ہِن۔ راج کمار ملک دی بیگم ہک سکول چلیندی ہے ۔ ڈاکٹر راج کمار سئیں اپݨے نال سکول بس تے اپݨی کار گھن اَئے ہَن ۔ ساݙا سارا سمان بس اِچ رکھ ݙتا ڳیا ۔ ڈاکٹر راج کمار نال کار وچ ظہور دھریجہ ‘ فرید پیرزادہ تے راقم الحروف ٻہہ ڳئے باقی سارے سنگتی بس وچ سوار تھئے اَتے بس سمیت ایہ قافلہ پرشاد نگر اِچ واقع بہاول پور بھون کن ٹُر پیا ۔ ڈاکٹر جے۔ سی۔ بترا اپݨے ردھیمے پاروں بھون نہ اَئے پر ڈاکٹر راج کمار ساکوں توڑ بھون تئیں پچاوݨ اَئے۔
حوالہ
[لکھو | ماخذ وچ تبدیلی کرو]کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان