دِلّی دا لال قلعہ

مین روڈ تے پچادھ کن جامع مسجد ہے تے پوادھ کن لال قلعہ ۔ لال پتھر دا بݨیا ہویا ایہ قلعہ انجینئر بادشاہ شاہ جہان بݨوایا ہا ۔ ایہ 1638ء اِچ اُسرݨ شروع تھیا ۔ ایہ قلعہ لاہور دے شاہی قلعے کنوں میکوں چھوٹانظردے ۔ قلعے وچ شاہی محل ہِن۔ جنہاں وچ رنگ محل تے دیوان خاص ٻہوں اہم ہِن۔ قلعے دے وچوں ہک آرائشی نہر گزاری ڳئی ہئی ۔ ایہ نہر سنگِ مرمر نال بݨی ہوئی ہئی ۔ ہُݨ ایہ نہر کوئنیں ۔ دیوان خاص وچ تخت طائوس (موروانگ تخت) رکھیا ڳیا ہئی جیندے اُتّے بادشاہ ٻہندے ہَن تے شاہی اجلاس کریندے ہَن ۔ نادر شاہ دِلّی تے حملہ کیتا تاں اوہ فتح دے بعد تختِ طائوس افغانستان چا ڳیا ۔ پہلے قلعے وچ مسیت نہ ہئی اورنگزیب ایندے وچ مسیت دا وادھا کیتا۔ ایہ مسیت چِٹّے پتھر نال بݨائی ڳئی ہے تے ہُݨ وی موجود ہے ۔ قلعے وچ پلاٹ ‘ باغات تے صحن ݙاڈھے سوہݨے ہِن۔

ایں ویلے ادّھے قلعے اُتّے فوج دا قبضہ ہے تہوں پورا قلعہ ݙیکھݨ مشکل ہے ۔ بر حال جو کجھ عوام کیتے کُھلا ہے اوہ وی مغلاں دی شاہی ۔ اُنہاں دی شان ‘ مہارت تے کمال دا اظہار ہے۔

…………

اَڄ دا ݙینہ اساں ڈاکٹرراج کمار ملک نال گزاریا ہئی۔ شام کوں جامع مسیت ‘لال قلعہ ‘ چاندݨی چوک ݙٹھا ہئی۔ کویلی ٹور بس تے سفر کیتا ہا ۔ کرول باغ کنوں پیریں بھون آئے ہاسے۔ تہوں ٹُر ٹُر کے تھک ڳئے ہاسے ۔ رات کوں ݙ وڄے تھکے ہارے بھون پُڄیوسے تاں تھکیڑے کنوں چُور ہاسے ۔ جلتی سم پیوسے کیوں جو سویلے ولا پریڈ تے ونڄݨاں ہا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان